Засгийн газрын өнөөдрийн ээлжит хуралдаанаас гарсан шийдвэрийг танилцуулах үеэр ЗГХЭГ-ын дарга Д.Амарбаясгалан дараах байр суурийг илэрхийллээ.

Тэрбээр “ Өргөө” амаржих газрын удирдлага, ҮЭ, ажилчдын хоорондын маргаан асуудал ил болсноор энэ салбарын асуудлыг хөндөх үндсэн шалтгаан болсон. Ажлын хэсэг ажиллаж эхэлсэн. 2022 оны наймдугаар сараас эхэлсэн энэ маргаан яамны түвшинд яригдаж сайд шийдвэр гаргасан. Нөгөө талдаа энд болж буй бодитой үйл явцаас харахад амаржих газрын даргын зөв байсан гэдэг асуудал өрнөж байгаа. Тийм учраас салбарын хэмжээнд хяналт шалгалт явуулах болсон. Засгийн газрын хэрэг эрхлэх газраас энэ хяналт шалгалтыг гардан богино хугацаанд явуулна. Мөн МХЕГ-ыг татан буулгаж, салбарын хяналт шалгалтыг салбарын яамдад хариуцуулна. Бусад боломжтой хяналт шалгалтыг хувийн хэвшилтэй хамтран ажиллах боломж бий. Энэ хүрээнд 300 орчим орон тоо хэмнэнэ. Мэргэжлийн хяналтын байгууллага 1600 гаруй алба хаагчтай. Уг байгууллага байгуулагдсанаас хойш 20 жилийн хугацаанд тодорхой үүрэг гүйцэтгэн ажиллаж ирсэн. Мэргэжлийн яамдад давхардсан 1400 ажилтан ажилладаг нь ил болсон. Төр давхардсан хяналтаар хүндрэл учруулж байна хэмээн иргэдээс гомдол ирдэг. Үүний шалтгааныг бид олж харсан. Санхүүгийн зэрэг хяналтыг мэргэжлийн хяналтын байгууллага давхар хийж байна. Энэ нь  иргэдэд хүнд суртлыг үзүүлэх шалтгаан болсон гэж үзэж байна. Мэргэжлийн хяналтын байгууллага нийт 26 чиглэлийн үйл ажиллагаа явуулдаг. Засгийн газрын дотоод хяналт шалгалтын агентлаг байгуулна. Энэ нь яам, тамгын газрын үйл ажиллагаанд хяналт тавих юм” гэлээ.