• Өнөөдөр 2026-03-20

Ёс зүйгүй гишүүддээ хариуцлага тооц, эсвэл ажлаа өг Б.БАТ-ЭРДЭНЭ гишүүнээ

2021-04-22,   1074

    Төрийн бодлого тодорхойлж, улс орны цаашдын ирээдүйг шийдэх УИХ-ын гишүүдийн ёс зүйгүй, хариуцлагагүй үйлдлүүд хэрээс хэтэрлээ. Ард түмэн төлөөллөө төрд илгээж, Монгол Улсын хөгжлийн бодлогыг тодорхойлж, эв нэгдлийг хангах үүрэг хүлээлгэснээс биш тэдэнд эрх мэдлээ урвуулан ашиглаж, дураараа дургихыг нь зөвшөөрөөгүй л байлтай. 

Харамсалтай нь, гишүүдийн эрх ямба, хэрээс хэтэрч, тэдэнд хууль дүрэм үйлчилдэггүй аятай аяглах боллоо. Тэр бүү хэл, шинээр бүрэлдсэн парламент “Гишүүдээ хариуцлагатай болгоно” гээд Байнгын хороотой болоод ч нэмэр болсонгүй. Тодруулбал, Ёс зүйн дэд хороог энэ удаагийн парламент Ёс зүй, сахилга хариуцлагын байнгын хороо болгон өргөжүүлж, эрх, үүргийг нь нэмэгдүүлсэн. Ингэснээр “Гишүүдийн ёс зүйн асуудалд анхаарал хандуулж, улам хариуцлагатай болгоно” хэмээн сайрхаж байсан ч өмнөхөөсөө улам дордож, гишүүдийн ёс бус үйлдэл гаарах боллоо. Хаана л дуулиан шуугиан, нийгмийн болж бүтэхгүй асуудал гарна түүнд УИХ-ын гишүүдийн нэр холбогдох болсон атал Байнгын хороо нэг ч удаа хуралдаж, гишүүдээ хүмүүжүүлсэнгүй. 

Хамгийн сүүлд гэхэд л УИХ-ын гишүүн Б.Пүрэвдорж согтууруулах ундаа хэрэглэсэн үедээ жолоо барьж, замын хашлага мөргөж, явган хүний зам дээр машинаа гаргачихсан зураг, бичлэг олон нийтийн сүлжээнд ил болоод буй.  Хөл хорионы хатуу дэглэм тогтоож, улс даяараа цар тахалтай тэмцэж буй энэ хүнд цаг үед төрийн түшээд нь дэглэмээ зөрчиж, шөнө оройн цагаар согтуурхаж яваа нь яавч зүйд нийцэхгүй байлтай. 
Тухайн үед эрхэм гишүүн өөрийн ухаангүй шахам байхдаа жолоо барьж, ноцтой осол гаргасан. Азаар хүний эрүүл мэнд, амь насанд эрсдэл учраагүй ч машин нь шатаж, онцгой байдлын алба хаагч нар цаг алдалгүй газар дээр нь ажиллаж, галын унтраасан талаар эх сурвалж мэдээлсэн. Б.Пүрэвдорж гишүүний тухайд өмнө нь хэд хэд удаа чуулганы хуралдаанд халамцуу сууж, агсам тавьсан удаатай. Гишүүдийг үг хэлж байхад үгийг нь тасалдаг, эсэргүүцдэг парламент дотроо нэлээд “сахилгагүй” гишүүдийн нэг билээ.
Түүнчлэн улсын хэмжээнд хөл хорио тогтоож, орон нутаг руу зорчих хөдөлгөөнийг хаачихсан үед тойрогтоо очиж, ахмадуудад Сар шинийн бэлэг тараасан байдаг.
Энэ талаар тэрбээр “Эрт болоод өнгөрсөн асуудал. Би дөрвөн удаа PCR шинжилгээ өгсөн.Ямар ч асуудалгүй. Би өөр ямар ч мэдээлэл өгөхгүй” хэмээн хээв нэг хариулж байсан “том толгойтой” нэгэн. Өмнөх парламентын үед ч Ёс зүйн дэд хорооны хурлаар орж, сахилгын шийтгэл хүртэж байв. Хөл хорионы дэглэм удаа дараа зөрчиж, согтуурхдаг гишүүнд Ёс зүй, сахилга хариуцлагын байнгын хорооны дарга Б.Бат-Эрдэнэ  хариуцлага тооцох нь битгий хэл толгойг нь илээд өнгөрөөх нь.
Ёс зүйгүй, хариуцлагагүй гишүүний дуулиан дан ганц Б.Пүрэвдорж гишүүнээр ч тогтохгүй. Түүнээс гадна олон гишүүн бий. Сүүлийн үед хамгийн их дуулианд өртөөд байгаа нь УИХ-ын гишүүн Ц.Анандбазар бөгөөд түүний эсрэг нийгмийн сүлжээнд томоохон давлагаа өрнөж байгаа.
 
Иргэн Б. Сүндэръяа “Ц.Анандбазар гишүүн болохоосоо өмнө өөрийг нь хүчиндэхийг завдсан, түүгээр ч зогсохгүй өнөөдрийг хүртэл тэвчишгүй дарамтад оруулж байгаа” хэмээн мэдэгдсэн. Түүний энэ мэдэгдлээс хойш нийгмийн сүлжээнд “Me Too” давлагаа өрнөж, хүчирхийллийн золиос болсон олон охид бий гэх мэдээлэл түгээд буй. Тодруулбал, Б.Сүндэръяа “Ц.Анандбазарын хүчирхийлэлд өртсөн 1000 охин байна” хэмээн мэдэгдсэн. Үүнтэй холбоотой ХЭҮК-оос гишүүн Ц.Анандбазарыг тайлбар хийхийг зөвлөсөн ч, эрхэм төрийн түшээд үүгээр нь дайжигнаж, “Би 1000 бүсгүйг xvчиpxийлэx чaлxтaй эр биш л дээ. Тооноос нь эхлээд л зохион байгуулалттай хуурамч гүтгэдэг гэдэг нь нoтлогдоод эхэллээ. Яг баримттайгаа гарч ирээд, нотлоод батлаад, надад хүчирхийлүүлсэн ганц ч атугай бүсгүй байвал бүх насаар нь “Сод монгол”-оор үнэгүй үйлчлүүлье” гэж охид, эмэгтэйчүүдээр тохуурхсан удаатай.
Хэлж буй үг, хийж байгаа үйлдлээс нь эхлээд л ёс зүйн асуудал сөхөгдөхөөр байтал мөнөөх гишүүдээ хүмүүжүүлдэг  Байнгын хороо нь нүдэн балай, чихэн дүлий алга болчихсон.
УИХ-ын гишүүдийн ёс зүйн асуудал үүгээр ч зогсохгүй. Иргэдээ хуурдаг, хууль дүрмээ мөрдөггүй, эрх мэдлээ урвуулан ашигладаг гээд уртаас урт жагсаалт гарах нь. УИХ-ын гишүүн, Шадар сайд С.Амарсайхан гэхэд л цар тахлын үед эрх мэдлээ урвуулан ашиглаж, эхнэрээ халдварын улаан бүс гэгдэх, ХӨСҮТ-рүү нэг хоног оруулаад гаргачихсан.
 
Энгийн иргэд коронавирусийн халдвараар нас барж байгаа гэр бүл, хайртай дотнын хүнтэйгээ жам ёсоороо нь салах ёс гүйцэтгэж чадахгүй хаалганы цаана үлдэж, халдварын голомтод ажиллаж буй эмч, эмнэлгийн ажилчид салхи нэвтрэхгүй битүү хувцастай, гэртээ ч харьж чадахгүй хэдэн сараар ажиллаж байхад Шадар сайдын эхнэр “Бохир заваан байна” гээд халдвартай бүсээс ганцхан хоноод гарчихсан.
 
Түүгээр ч зогсохгүй Шадар сайдын хүү А.Эрдэнэхүслэн нь Их Британи, Умард Ирландын нэгдсэн вант улс буюу Английн Бристолын Их Сургуульд сурах сургалтын төлбөр хэмээн 27 166 ам.доллар буюу 77 сая 423 мянга 100 төгрөгийн зээлийг Боловсролын зээлийн сангаас авсан нь баримтаар нотлогдоод буй. Угтаа бол зорилтод бүлэгт хүргэх энэ зээлийг Засгийн газрын давхар дээлтэй сайдын хүү бусдадаа боломж олголгүй “ногоон гэрлээр” авчихсанд олон нийт бухимдаж буй. Энэ мэт эрх мэдлээ урвуулан ашигладаг, ард түмнийхээ боломжийг хулгайлдаг ёс зүйгүй гишүүддээ хариуцлага тооцох нь битгий хэл чихээ таглаад, нүдээ аниад дуугүй өнгөрөөсөөр л байгаа юм.
 
УИХ-ын чуулганы хуралдаан дээрээ бандааштайгаа суудаг Ж.Бат-Эрдэнэ, цахим хуралдаа зургаа тавиад иргэдээ хуурдаг Ц.Мөнхцэцэг гишүүнд ч ёс зүйн хариуцлага тооцоогүй, таг дуугүй өнгөрөөчихсөн. Хөл хорионы дэглэм зөрчиж, тойрогтоо бэлэг тараадаг УИХ-ын гишүүн Ж.Батсуурь, олон хүн дагуулж, Асралт хайрхан дээр гардаг С.Бямбацогт зэрэг гишүүдийнхээ толгойг нь илээд хариуцлага хүлээлгээгүй Ёс зүй, сахилга хариуцлагын байнгын хороо ажлаа хий. Ард түмнээ төлөөлж, төрийн эрхийг барьж байгаа түшээд нараа хариуцлагатай, ёс зүйтэй байлгаж чадахгүй бол Б.Бат-Эрдэнэ гишүүн та Байнгын хорооны даргын ажлаа хүлээлгэж өгнө үү.
 

Ёс зүйгүй гишүүддээ хариуцлага тооц, эсвэл ажлаа өг Б.БАТ-ЭРДЭНЭ гишүүнээ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.eccold.top хариуцлага хүлээхгүй.

Нийт сэтгэгдэл: 2
  • Сэтгэгдэл үлдээсэн: 2021-04-22 16:18:31
    зочин: Эхлээд гэм буруутайг нь хуулийн дагуу тогтоох байхдаа. дараа нь хариуцлага тооцох биз
  • Сэтгэгдэл үлдээсэн: 2021-04-22 14:15:47
    Зочин: Юу яасан ёс зүйн асуудал?! Зантгар толгойд нь булингартай ус л байгаа. Бөх хүн маанаг гэдгийг мэддэггүй юм уу?
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.