• Өнөөдөр 2026-03-20

“С.Зоригийн хэрэг” гэх МАН-ын амь зуулга, өрсөлдөгчдийгөө харлуулах ядсан арга нь Х.Баттулгыг ганхуулах уу

2021-03-10,   1341

-Х.БАТТУЛГА ҮНЭХЭЭР Л БОЛЖ БҮТЭХГҮЙ БОЛГОНЫ ЭХ УНДАРГА ЮМ УУ, ЭСВЭЛ МАН ТҮҮНИЙГ ОЛОН НИЙТЭД ТЭГЖ ХАРАГДУУЛААД БАЙДАГ ЮМ УУ. ҮГҮЙ БОЛ МАН Х.БАТТУЛГААС ТЭГТЛЭЭ АЙДАГ ХЭРЭГ ҮҮ-
         
            Шатраар бол МАН бод, бог бүрэн атлаа Х.Баттулга гэх ганц ноёныг унагах гэж өдөр шөнөгүй, өөд уруугүй шаглаж, дуглаж, цодлоод ч амжилтыг эс олсоор өдийг хүрч байна. “Женко” Х.Баттулгаас Ерөнхийлөгч Х.Баттулга болох үедээ тэр “Төмөр замын луйварчин” нэртэй байсан. Ерөнхийлөгч болоод өнгөрсөн дөрвөн жилийн хугацаанд “Оффшорчин”, “Авлигачин”, “Авгай хүүхэн солигч”, “Оросуудын гар хөл”, “Орос хүүхэнд дурлагч”, “Шүүхийг атгагч”, “Шүүгч нарыг эрхшээгч”, “Өмч хувьчлалаар хөлжигч”, “Сэжигтэн”, “Жагсаал цуглаан өдүүлэгч”, “Хятадуудтай хуйвалдагч”, “Худалч, хулгайч”, “Хоосон амлагч”, “Мөнгө угаагч”, “Хаус наймаалагч” гэх мэт уртаас урт гуншинтай болсон. Түүнийг ийм баялаг атлаа бараан “намтартай” болгох, эсвэл угаас байсан бараан намтарыг нь нийтэд дэлгэх кампанит ажлын багахан хэсгийг нэг намын, нэгэн үеийн хамтран зүтгэгчид нь, ихэнхийг нь МАН дангаараа өрнүүлсэн гэхэд хилсдэхгүй. Энэ дунд үнэн ч бий, бас худал ч бий л биз. 
 
Нэг ам.долларын зураачаас Монголын толгой баян болж, дараа нь УИХ-ын гишүүн, хоёр яамны сайд, тэгээд Ерөнхийлөгч болсон хүний хувь, хувьсгалын замналд “но” олон бий нь мэдээж. Х.Баттулга өөрийгөө харлуулах хэтэрхий олон эмзэг цэгтэй юм, МАН ч тэр цэгүүдийг нь сайн олох юм. 
 
Гэхдээ Х.Баттулгад гайхмаар нэг давуу чанар байна. Тэр нь өөрийнх нь эсрэг бүхнийг эрс няцааж, үгүйсгэж, “Ор үндэсгүй гүтгэлээ” гэж заргалдаж явсан нь ганц, хоёрхон. Саяхан, Ерөнхий сайд асан У.Хүрэлсүхэд гомдсондоо нэг удаа “Итгэж явсан сэтгэл рүү минь ус цацаж, намайг жагсаал зохион байгуулсан гэлээ” хэмээн тунирхсан. Дараахан нь, Хууль зүй, дотоод хэргийн сайд Х.Нямбаатарт “Чи намайг шүүгчдэд даалгавар өгдөг гэлээ. Чамайг шүүхэд өгнө” гэж ундууцсан. Бусдаар Х.Баттулга үнэхээр үнэнд гүйцэгдсэн учраас амиа хамхиад суудаг юм уу, эсвэл “Би буруугүй” гэж мянга орилоод эдний хар пи ар-ыг дийлэхгүй гэж хүлцдэг юм уу. Эсвэл тэр “Өөрөө унасан хүүхэд уйлдаггүй” гэдгийг маш сайн мэддэг байх, ер ам нээсэнгүй.  Ямартай ч яасан ноолж ханадаггүй, уйгагүй  МАН юм, яасан ноолуулж ханадаггүй, хүлцэнгүй Х.Баттулга юм.  Бүтэн дөрвөн жил нэг нь харлуулах, нөгөө нь хүлцэх тактикаар явж ирлээ. Х.Баттулгын эсрэг намаараа ингэж идэвхтэй ажиллана гэдэг цаанаа түүнээс айж байгаагийн л илрэл. 
 
              Ерөнхийлөгч Х.Баттулгын эсрэг ашиглахаар МАН-ын цуглуулсан баримт материал, зохиолын нөөц шавхагдаж буй бололтой байна.  МАН Х.Баттулгын бараг бүхий л эмзэг цэгийг нь олж хатгасан. Одоо бараг хатгах цэг үлдсэнгүй. Арга ч үгүй. Нэгэн үед Х.Баттулгын “17 чингэлэг”-ийн хэрэг, “Мах импекс”-ийн өмч хувьчлал зэрэг нь сенсаци дэгдээдэг байсан бол одоо улиг болж, хоцрогдсон сэдэв. Энэ тухай дахин гаргаж ирвэл МАН өөрсдийгөө л жижигхэн харагдуулна. Өнгөрсөн намраас Х.Баттулгын Төмөр замын тендер будлиулсныг нь, Оффшор бүс дэх нууц компаниа охиноороо дамжуулан удирддагийг нь, Салхитын мөнгөний ордын хэргийг ашиглах 17 шүүгчээр шүүхийг гартаа авсныг нь, Оффшор бүсээс мөнгө оруулж ирж, өрх бүрд сая төгрөг тараана гэж худлаа амласныг нь гээд булхай, луйвар, худал хуурмаг байж болох бүхнийг нь л гаргаж ирж байна. Гэтэл Х.Баттулга алиныг нь ч ойшоодоггүй, ам нээж тайлбар хийдэггүй, хар цагаан дуугүй суудаг хэвээрээ. Өнөөх хүлцэх тактикаа яс барьж байна. 
 

Эцэст нь, МАН Х.Баттулгыг С.Зоригийн хэрэгт хамаатуулах шинэ төлөвлөгөө бодож олсон бололтой, Л.Оюун-Эрдэнэ ч эхлэлийг нь тавьчих шиг боллоо. Ингэхдээ эл төлөвлөгөөг эртнээс бодож, боловсруулсан нь илэрхий байна. Тухайлбал, өнгөрсөн сарын сүүлчээр “ҮАБЗ-ийн ажилтан Б.Баасанцогт шүүгч нарыг архидуулдаг, биеэ үнэлэгч зуучилж өгдөг” хэмээх хоёр ангит сериал нийтэд цацагдсан. Тэгвэл уг хоёр ангит сериалаар дамжуулан Б.Баасанцогт гэх залууг гэнэт олны анхааралд оруулж, зард гаргаж, Ерөнхийлөгч Х.Баттулга, ҮАБЗ-ийн Нарийн бичгийн дарга А.Гансүх хоёртой нэг биш сэжмээр холбож, тэдний хүн гэж “илчилсэн”-ний цаад шалтгаан уржигдар ил боллоо. Ил боллоо ч гэж, Ерөнхий сайд Л.Оюун-Эрдэнэ ил болголоо. Чухамдаа түүн дээр фокусласан гүйцэтгэх ажиллагаа явуулж, шүүгч нартай архидан согтуурсан бичлэгийг олж аваад нийтэд цацсан жинхэнэ зорилго нь Б.Баасанцогтоор дамжуулан Ерөнхийлөгч Х.Баттулгыг С.Зоригийн хэрэгт ямар нэг байдлаар хамаатуулах төлөвлөгөө байж. Ерөнхийлөгч Х.Баттулгатай эртний хамтрагч, ҮАБЗ-ийн Нарийн бичгийн дарга А.Гансүх ч үүнд хамаатай болоод хувирчихлаа. Өөрөөр хэлбэл, МАН алсыг харсан, сайтар төлөвлөсөн нүүдэл хийж, Х.Баттулгыг “шаглалаа”. 

 
             Сонгууль бүрээр сөхөж гаргаж ирээд өрсөлдөгчийнхөө эсрэг ашигладаг МАН-ын мөнхийн сэдэв нь “С.Зоригийн хэрэг” болоод даруй хэдэн сонгууль ардаа хийж байна. Гэхдээ зөвхөн өөрсдийнхөө маш их айсан, хүчтэй өрсөлдөгчийнхөө эсрэг л энэ аргыг ашигладаг. Чухамдаа МАН-ын үнэхээр арга мухардсан үедээ ашигладаг эцсийн бөгөөд шалгарсан арга нь гэх үү дээ. АН-ын гэлтгүй МАН-ын томчуудад ч энэ сэдэв хэзээд халгаатай байсаар ирсэн. Энэ удаад Х.Баттулга дээр хэрэгжүүлэх гэж байгаа бол МАН Х.Баттулгаас үнэхээр их айж байгаа гэсэн үг үү. Харин Х.Баттулгад энэ арга нь үйлчлэх болов уу, яах бол. Харах л үлдэж байна. 
 

“С.Зоригийн хэрэг” гэх МАН-ын амь зуулга, өрсөлдөгчдийгөө харлуулах ядсан арга нь Х.Баттулгыг ганхуулах уу
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.eccold.top хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.