Улаанбаатарын түгжрэлийг ирэх жил гэхэд цэгцлэхгүй бол 2024 оны сонгуульд ялагдах магадлалтай болчихсон МАН-ынхан аргаа бараад давхар дээлтэй сайд томилоод ч тусыг олохгүй нь бололтой. Тэрбатугай давхар дээлтэй сайд нь хотын даргынхаа бүтэлгүй ажиллагааны араас ороод хөл нийлүүлээд хөглөж өгөх нь дээ энэ хоёр. 

 

        Цаг хүйтэрч, урь ороод ирэхээр нийслэлийн ажил толгой дараалан нэмэгддэг. Тэсгэм хүйтнээс өмнө нийслэлчүүд халаалт, цахилгаанаа засаж, түлэх түлшээ бэлдэж, өвлийн бэлтгэлээ хангахгүй бол налгар намар энэ чигээрээ үргэлжлэхгүй нь лавтай. Гэтэл хотын дарга нь давхар дээлтэй сайдтайгаа нийлээд хотын түгжрэл ярьж, хөглөхөөс өөр бүтээж байгаа ажил төдийлөн харагдахгүй л юм. Уг нь өнгөрсөн жилээс нийслэл өөрийн төсөвтэй болоод хотын түгжрэлээ шийдэх 420 тэрбум төгрөгийн тусгай төсөв гаргаад ярьснаараа бол хэдэн сайхан төсөл хэрэгжүүлчихсэн, чих амар сууж байх байлаа. Дарга нарын ярьснаар манайх өдийд дүүжин тээврээр гэр хороолол дээгүүрээ “нисээд”, хурдан галт тэргээр газар доогуураа давхиад Яармагийн замаар усан тээвэр хөлөглөөд үлгэрийн амьдралаар амьдрах байв.

 

       Гэтэл “дээвэр, туурга”-аа зузаалж, идэш хоолоо бэлдэх цаг дээрээ мөнөөх л уль доль болсон түгжрэлийн асуудлаа ярьсаар шийдэлд ч хүрсэн юмгүй таван төгрөгөө тал бүрд цацчихаад сууж байгаа нь өнөөдрийн бодит байдал байна. Өвлийн улиралд нийслэлчүүдийн шүдний өвчин болсон утаа униараа ч ярих завгүй байна. Эндээс харахад хотыг хоёр хүн удирдаад ч барахааргүй их ажил нь түгжрэл болжээ хөөрхий. Нөгөө талаараа Сум, Сүх хоёр Улаанбаатар хотоор мөн ч их тоглож байна даа. 

 

        УИХ-ын гишүүнээсээ дээшлээд байна уу доошлоод байна уу мэдэхгүй хэмээн гоморхож байсан Д.Сумъяабазар өнгөрсөн жил хотыг удирдах гэж мөн чиг их хөглөсөн дөө. Ямар сайндаа л туслахуудынхаа бичиж өгсөн төлөвлөгөөг цаасан дээрээс ба бэ-гүй, цэг таслалтай нь уншиж байгаад олны доог болсон. Түүгээр ч зогсохгүй хэдэн тооны учрыг нь олохгүй буруу бодож, хэвлэлийн хуралдаа хөгөө чирсэн дуулиантай нэгэн. Ийн хөлөө олохгүй цэрэг шиг будилж яваа даргын балгаар хотын ажил нэг урагшилсангүй. Өнгөрсөн жилийн өдийд Д.Сумъяабазар дарга Хотын түгжрэлийг бууруулах есөн бүлэг ажлыг Засгийн газарт танилцуулж байв. Өнөөдөр есөн бүлэг ажлынхаа нэгийг нь эхэлсэн үү Хотын дарга аа. Хэрэвзээ есөн бүлэг ажил дээрээ автомашиныг тэгш, сондгойгоор явуулах гээд биччихсэн бол нийслэлийн төсвийг үргүй зарцуулж, бичиг, цаасны гарз хийчихсэн юм биш биз дээ.

          Цаасан дээр бичиж танилцуулсан сүржин нэртэй даржин төлөвлөгөө одоо хаана явна, бүү мэд. Ямартай ч өнөөдөр бид үүнийг нь хэрэгжүүлээд эхэлсэн. Үүний үр дүнд ийм ажил нь нааштай байна гэсэн ганц ч үг ард түмэнд танилцуулсангүй. Ер бол үеийн үед гал алдахгүй, өдөр хоногоо аргацаасан төлөвлөгөө боловсруулаад түр зуур түймрээ унтраадаг уламжлалт жишгээрээ л Улаанбаатарын хөгжил өрнөж байна даа. Ёстой л сүйхээтэй нэг нь аргаа бодож, үлдсэн нь урсгалаараа явахаас өөр сонголтгүй нийгэмд бид байгаа нь өнөөдрийн бодит байдал болоод байна.

        Дэлхийд Азийн цагаан дагина гэж гайхагддаг Улаанбаатар хот 1990 оноосоо хойш хүнийх нь тоо нэмэгдсэнээс хөгжил нь дээшилсэн нэг зүйл байхгүй гээд хэлчихэд хол зөрөхгүй. Уг нь төрд суусан туршлага, хөрөнгө мөнгөнийхөө хэмжээгээр өдийд Д.Сумъяабазар дарга нийслэлээ аль хэдийнэ өөд нь татаад, толгойны өвчнөөсөө нэг нэгээр нь салж байх хэмжээний эрх мэдэлтэй нэгэн баймаар. Гэтэл өнгөрсөн жил гаруй хугацаанд сайжирсан юм гэж үзье гэсэн ч алга даа.

 

 Үндсэндээ Монгол Улсын хүн амын тэн хагас нь амьдардаг Улаанбаатар хот яг энэ байдлаараа өвлийн хүйтэнтэй золгох нь ээ. Нөгөө л утаа униар, нөгөө л түгжрэл таг хэвээрээ байх нь.

 

НИЙСЛЭЛ ХАРИУЦСАН САЙД НЬ НАС БАРСАН ХҮНДЭЭ МӨН ЧИГ ХҮНДЭТГЭЛГҮЙ ХАНДЛАА

            Ажлаа хийгээд түгжрэлээ шийдэх гэтэл муу л бол хар овоохой гэгчээр мөнөөх ард түмэн нь саад хийгээд ажлыг нь урагшлуулахгүй, хойш нь татаад байгаа гэх үлгэрийг Нийслэл хариуцсан сайд нь хээв нэг хэлж байх. Өчигдөрхөн Нийслэл хариуцсан сайд түгжрэлээ шийдэхээр дарга нартайгаа ширээ тойроод суутал замын ачааллыг нэмэгдүүлж байгаа ганц шалтгаан нь сүүлчийн замдаа гарч буй талийгаач нар болж таарсан гэнэ. Мань түшээд гол шалтгааныг нь олоод, цахим хаягтаа жиргэсэн нь олны дургүйцлийг төрүүлж, амруугаа нэг сайн алгадууллаа. Тодруулбал, Нийслэл хариуцсан сайд Ж.Сүхбаатар өөрийн цахим хаягаараа дамжуулж, "Буяны цуваа энэ өдрүүдэд түгжрэлд нөлөөлдөг. Ламаас асуусан цагаар ихэвчлэн явагддаг, тэр нь түгжрэлийн оргил цагтай давхцдаг. Улсын нэгдүгээр төв эмнэлэгийн орчимд бөөгнөрөл үүсдэг. Буяны газрын удирдлагуудтай дараа уулзалт хийж ярилцахаар төлөвлөж байгаа…" хэмээн жиргэснээр сүүлчийн замдаа гарч буй хөөрхий талийгаач нарыг түгжрэл үүсгэх гол шалтгаан болж байна гэж ад үзэв. 

 

           Ингээд ард түмэн зөв бурууг нь шүүхээр эрхэм сайд нь "Түгжрэлд маш олон хүчин зүйл бий. Хэн ч буяны ажлыг буруутгахгүй нь ойлгомжтой. Шарил хадгалах газраа буруу байршилд байлгаж байгаа тухай асуудал. Эмнэлэг, буяны газруудтай хамтарч ажиллан зан үйлийн ёслолыг хотын төвөөс өөр илүү зохистой байршилд шилжүүлэх тухайд өгсөн хариулт.  Заавал мушгин гуйвуулж байж “таашаал” авах нь зарим хүний сэтгэл ханамж юм даа…"  хэмээн өөрийгөө өмөөрч, матрын нулимс унаж харагдана лээ. Будаач будаач гэхээр сахлаа будав гэгч нь л болж байна даа. УИХ-д хоёр дахь удаагаа сонгогдсон МАН дотроо арай дөнгүүр нь гэх магтаалд умбаад байсан эрхэм түшээд ийн зэс нь цухуйж эхлэх нь тэр. Жил гаруй хугацаанд сайдын суудалд суухаар нэр хичээж байсан Ж.Сүхбаатар гишүүн ийн яамгүй сайд болвуутаа “поп” зангаа барьж чадсангүй. 

          Нам дундаа туршлагатай, тулахтай нь гэж ард түмэн үнэлдэг гишүүн нь ажлаа хүлээж аваад л үнэн төрхөө таниулж, түмшэлийн ямбаа эдлээд эхэлчихлээ. Уг нь Ж.Сүхбаатар сайдад давхар дээл өмсүүлж, давхардсан албан тушаал хаших хариуцлагатай үүргийг олгосон байх. Харамсалтай нь, гишүүний санаанд хийх ажил нь биш, дэмжиж итгэсэн ард түмэн нь саад болсон бололтой. 

 

 Сонгууль болох дөхөөд сандар ч байгаа нь аргагүй. Гэхдээ үхсэн хүн үг хэлэх биш түгжрэлд талийгаачид буруутай гээд улайн цайм зүтгэж боломгүй баймаар эрхэм сайд аа.