Жил бүрийн битүүний өдөр уламжлал болгон зохион байгуулдаг Цагаан сарын барилдааныг хүсэн хүлээдэг бөхийн хорхойтон олон бий. Харин УОК-оос цар тахалтай холбоотойгоор энэ жил барилдаан зохион байгуулах шаардлагагүй гэж үзсэн. 1963 оноос хойш тасралтгүй болж байсан Сар шинийн бөхийн барилдаан түүхэндээ анх удаа өнгөрсөн жил өнжсөн юм. Иймээс ч Монголын үндэсний бөхийн холбооноос бөх сонирхогчдодоо зориулан 128 бөхийн барилдааныг Говь-Алтай аймагт үзэгчгүйгээр зохион байгуулах, үүнд шаардлагатай зардлыг холбооноос гаргахаар хүсэлт тавьсан ч  дэмжигдэх эсэх нь эргэлзээтэй байна. Гэсэн хэдий ч ЭРГЭЛТ.МН мэдээллийн сайт бөхийн хорхойтнууддаа зориулан Цагаан сарын барилдаантай холбоотой сонирхолтой баримтуудыг хүргэе.

• Анх Цагаан сарын барилдааныг 1963 оноос “Нэгдэлчдийн баярын барилдаан” гэх нэрээр зохион байгуулж эхэлсэн. Хамгийн анхны “Нэгдэлчдийн баярын барилдаан”-д нийт 64 бөх зодоглосноос Дархан аварга Ж.Мөнхбат түрүүлж, Улсын аварга Ч.Бээжин үзүүрлэжээ.

• Хэнтий аймгийн Өмнөдэлгэр сумын харьяат Дархан аварга, Хөдөлмөрийн баатар Б.Бат-Эрдэнэ Цагаан сарын барилдаанд хамгийн олон түрүүлсэн амжилтыг эзэмшдэг. Тэрбээр Цагаан сарын барилдаанд нийт 13 удаа түрүүлэхдээ завсаргүй 11 жил түрүүлсэн байна. Түүний 11 удаагийн завсаргүй түрүүг 1999 онд Дархан аварга А.Сүхбат учраа тааран зогсоож байсан юм.

• Цагаан сарын барилдаанд хамгийн олон удаа үзүүрлэсэн амжилтыг Дархан аварга Д.Цэрэнтогтох эзэмшдэг. Тэрбээр 1979, 1981, 1985, 1987, 1990 онд  үзүүрлэж байжээ.
• Аймгийн цолтойдоо Сар шинийн барилдаанд түрүүлж, үзэгч олныгоо баясгасан хоёрхон хүчтэн бий. 2010 онд Улсын аварга Ч.Санжаадамба Цэргийн арслан цолтойдоо тэргүүлсэн бол түүний дараах жил нь Улсын харцага Ш.Мөнгөнбаатар Аймгийн арслан цолтойдоо түрүүлсэн аж.

• Харин Цагаан сарын барилдаанд Улсын аварга цолондоо хүрснээс хойш түрүүлсэн нийт 14 бөх байдаг. Үүнд Дархан аварга Д.Дамдин, Х.Баянмөнх, Д.Цэрэнтогтох, Б.Бат-Эрдэнэ, А.Сүхбат, Г.Өсөхбаяр, Даян аварга С.Цэрэн, Улсын аварга Д.Хадбаатар, О.Балжинням, Д.Сумъяабазар, С.Мөнхбат, Г.Эрхэмбаяр, Ч.Санжаадамба нар багтана.
• Улсын аварга Д.Хадбаатар Улсын арслан цолтой байхдаа Цагаан сарын барилдаанд гурван удаа түрүүлэхдээ үзүүр, түрүүний барилдаанд бүгдэд нь Өвөрхангай аймгийн харьяат бөхчүүдтэй тааран барилдсан нь өдгөө хачирхалтай баримт болон үлджээ. Тэрээр 1980 онд Өвөрхангай аймгийн Хужирт сумын харьяат Улсын заан Д.Долгорсүрэн, 1984 онд Хужирт сумын харьяат Улсын заан Ё.Ишгэн, түүний дараа жил Нарийнтээл сумын харьяат Дархан аварга Д.Цэрэнтогтох нартай учраа тааран барилдсан юм.

• Цагаан сарын барилдааны шөвгийн дөрөвт аймгийн цолтойдоо шалгарсан дөрвөн бөх байдаг. Тодруулбал, анх удаа 1981 онд Улсын начин Д.Нэмэхбаяр аймгийн цолтойдоо шөвгөрч байжээ. Үүний дараагаар 2008 онд Улсын гарьд Ш.Жаргалсайхан, 2011 онд Улсын начин Ж.Чулуунбат нар шөвгөрч байжээ.
• Улсын харцага О.Хангай аймгийн цолтойдоо Цагаан сарын барилдаанд хоёр удаа буюу 2014, 2017 онд үзүүрлэсэн. Харин 1998 онд Улсын арслан Б.Ганбат, 2000 онд Улсын харцага Ц.Магалжав нар тус тус нэг удаа үзүүрлэсэн амжилт үзүүлж байжээ.