Хүннү гүрний 2232, Их Монгол улсын 817, Үндэсний эрх чөлөө, Тусгаар тогтнолоо сэргээн мандуулсны 112, Ардын хувьсгалын 102 жилийн ойн баяр цэнгэл наадам хязаалан насны морины уралдааны айргийн дөрөвт Говь-Алтай аймгийн Эрдэнэ сумын уугуул Ж.Дэмбэрэлсайханы бор үрээ хурдаллаа. Түүний сэтгэгдлийг хуваалцаж байна.

         Ж.Дэмбэрэлсайхан “Улсын баяр наадам сайхан эхэллээ. Наадам зохион байгуулалттай сайхан болж байна. Миний бор үрээ Дорнод аймгийн Цагаан-Овоо сумын Б.Батсайхан гэж хүний унаган адуу. Төв аймгийн Эрдэнэ сумын харьяат Нацагдоржийн Мөнх-Эрдэнэ гэж аймгийн алдарт залуу уяж, хурдлуулж өглөө. Би Төрийн их баяр наадмын хүй мандалын торгон ногоон дэвжээнд 13 жил морио уяж, өнөөдөр анхны айргийг авлаа. Их баяртай байна. Миний бор үрээ Дорнодын бүсийн наадамд 10-аар давхиж, өнгөрсөн жил улсын баяр наадамд 20-д давхиж, энэ жил сайхан айрагдаж, баярлууллаа. Энэ жил манай Говь-Алтай аймгийн 100 жилийн ой тохиож байгаа. Бор үрээтэйгээ очиж уралдана даа” гэлээ.