Өнгөрсөн жил байдгаа шавхаж байгаад худалдаж авсан залуу гэр бүлийн байшин Сэлбэ голын усанд урсаад явчихжээ. Гэрийн эзэд гурав хоногийн өмнө хотын төв бараадаж, зуслангаа түгжээд явсан байна. Харамсалтай нь, өчигдөр өглөө зуслангийнх нь байшин усанд урсаж байгааг цахим сүлжээнээс хараад хар хурдаараа Сэлбийн эрэг дээр гүйж явахтай таарлаа. Амьдарч байсан байшингийнх нь суурь үлдэж, хашааных нь тал, эд хогшил нь голоор нэг урсаж явна.

       Залуухан эмэгтэй “Өчигдөр л гэртээ ирдэг байж. Байшингийнхаа бичлэгийг цахим сүлжээнээс хараад ирлээ. Усны түвшин нэмэгдээд байгаа учраас байшинг маань голоос гаргах боломжгүй гэнэ. Уг нь хоёр давхарт байгаа эд хогшлоо гаргаад авчихмаар байна. Буйдан, цахилгаан зуух маань голын зүүн эрэгт шидэгдсэн байна лээ.Буйдангийн нэг хэсэг нь гүүрний дор урсаж явна гэнэ. Хамаг эд хогшил маань энэ хавиар нэг тарсан байна лээ. Бид төмөр суурь, хашааны тал, усан дотор байгаа байшингийн хэлтэрхийтэй л үлдэж байх шиг байна. Өнгөрсөн жил энэ байшинг худалдаж авсан. Бичиг баримт нь бидний нэр дээр шилжээгүй, хурлын шийдвэрийг хүлээж байсан. Манай байшин голын эргээс хол зайтай байсан шүү дээ. Үерийн усны дээд хэсгээс нэг байшин урсаж ирээд, манай байшинг мөргөчихсөн юм байна лээ. Тэгээд төмөр суурьнаасаа салаад голд урсчихлаа” гэв.

       Цагдаагийн албан хаагчид хэрэг бүртгэл нээж, байшингийн эздээс мэдээлэл авч байна. Онцгой байдлын газарт дуудлага өгч, албан хаагчид газар дээр нь ажиллаж, нөхцөл байдалтай танилцаад санд мэнд явлаа. Шаргаморьтын гүүрний урд талд байрлах иргэн Г.Мөнхтуяагийн гэр усанд урсах гээд байгаа учир тэд яаруу сандруу явсан нь энэ. Харин усанд урссан байшингуудыг ус татарсан хойно л голоос гаргах боломжтой бололтой. Түүнчлэн усанд урссан хоёр байшингийн нэгнийх нь эзэн олдоогүй байна. Сүхбаатар дүүргийн 19 дүгээр хорооныхон эрсдэлтэй айлуудаар орж, байшингийн эзнийг хайж байгаа аж.