Автозамын тээврийн ослоор нэг хүн амиа алджээ. Тодруулбал, Өмнөговь аймгийн Цогтцэций сумын Сийрст багийн Гүн гашуун гэдэг газарт ачааны автомашины араас суудлын автомашин мөргөж, автомашины эд ангид нэг хүн хавчуулагдсан тухай дуудлага иржээ. Дуудлагыг дагуу тус аймгийн Онцгой байдлын газрын Цогтцэций сум дахь Гал түймэр унтраах, аврах 44 дүгээр ангийн алба хаагчид очиж “Лексус РЭкс450” загварын суудлын автомашин, “Норд бенз” загварын ачааны автомашины хоосон чиргүүлний араас мөргөж суудлын автомашины жолооч Г /50 настай, эрэгтэй/ автомашины эд ангид хавчуулагдаж нас барсан байжээ. Албан хаагчид 120 минут ажиллаж, цогцсыг гаргаж, тус сумын сум дундын Цагдаагийн хэлтсийн ахлах мөрдөгчид шилжүүлэн өгчээ.