Улаанбаатар хотоос Ховд аймагт очсон ачаа тээврийн автобусанд нууцаар 10 хүн тээвэрлэж очсон зөрчил илэрсэн талаар бид мэдээлсэн билээ. Тодруулбал, энэ сарын 15-нд тус аймгийн Бичигтийн постоор нэвтэрсэн ачаа тээврийн автобусанд 10 хүн тээвэрлэж явсныг мэргэжлийн байгууллагынхан илрүүлсэн юм. Автобусанд нуугдаж очсон иргэдийг “Цагаан уул” амралтын газарт тусгаарлаж, коронавирусийн халдварын эсрэг шинжилгээ авчээ. Ингэхэд хоёр хүний шинжилгээний хариу эерэг гарчээ. Энэ талаар Ховд аймгийн Засаг даргын орлогч Т.Жаргалсайханаас тодруулахад “Түргэвчилсэн оношлуулаар шинжилгээ авахад хоёр хүний шинжилгээний хариу эерэг гарсан. Одоо PCR шинжилгээнд хамруулж, баталгаажуулна. Ачааны автобусанд нууцаар очсон иргэдийг хамт “Цагаан-Уул” амралтын газар тусгаарлаад байгаа. Бусад хүнээс нь шинж тэмдэг илрээгүй” гэлээ.