Үндэсний баяр наадмыг хойшлуулсантай холбоотой хөдөө орон нутгийг зорих иргэдийн тоо эрс нэмэгдсэн.

УОК-оос орон нутаг руу зорчих хөдөлгөөнийг хэвийн үргэлжүүлэх, халдвар хамгааллын дэглэм мөрдүүлэх чиглэл өгөөд буй. Тэгвэл Архангай аймгийн Өгийнуур суманд иргэд олноороо очиж,  нуурын эрэг дагуу олон хүний бөөгнөрөл үүсжээ.

Энэ талаар бид Өгийнуур сумын Засаг дарга Ш.Үүрцайхаас тодрууллаа. Тэрбээр "Манай сум хөл хорионы дэглэмээ сулруулж, жуулчдыг нэвтрүүлж байгаа. Сүүлийн хоёр өдөр хотоос ирэх иргэдийн тоо эрс нэмэгдсэн. Өгий нуурыг тойрсон амралтын газар, жуулчны бааз бүгд дүүрч, хувиараа гэр буудал ажиллуулдаг иргэдийн гэр ч дүүрсэн гэсэн. Нуураа тойроод майхантай аялагчид олноороо буусан байдалтай байна. Байгаль орчны байцаагч нар газар дээр нь ажиллаж, халдвар хамгааллын дэглэмийг мөрдүүлэх талаар арга хэмжээ авч ажиллаж байгаа" гэлээ.