ЭМЯ-наас коронавирусийн халдварын нөхцөл байдлын талаар мэдээлэл хийлээ. ХӨСҮТ-ийн Тандалт судалгааны албаны дарга А.Амбасэлмаа "ХӨСҮТ, ЗӨСҮТ, Сэлэнгэ, Дархан-Уул, Ховд аймагт нийтдээ 12828 хүнд шинжилгээ хийхэд 20 хүнээс коронавирусийн халдвар илэрлээ. Тодруулбал, арванхоёрдугаар сарын 20-нд тусгай үүргийн нислэгээр ирсэн хоёр иргэний давтан шинжилгээнээс коронавирус илэрсэн. Ингэснээр зөөвөрлөгдсөн тохиолдол 397 боллоо. Харин үлдсэн 18 тохиолдол нь Улаанбаатар хотод үүсээд байгаа голомтын хавьтлуудаас батлагдсан байна. Баянзүрх дүүргийн голомтод сахиур хоёр, эмнэлгийн ажилтан тав, өвчтөн найм, ойрын хавьтал гурван хүнээс халдвар илэрлээ. Нийтдээ Баянзүрх дүүргийн Нэгдсэн эмнэлгийн голомттой хамааралтайгаар 244 хүн халдвар авсан нь батлагдлаа. Мөн Баянзүрх дүүргийн Нэгдсэн эмнэлгийн голомтын хавьтал болох "Тэнүүн-Огоо" ХХК-ний хоёр хүнээс нь халдвар илэрсэн. Тус компанид ажилладаг 10 гаруй хүн салхинд гарснаас хоёр хүнээс нь халдвар илрээд байна. Салхинд гарсан болон автобус баазын 90 гаруй хүнээс шинжилгээ авахад эхний байдлаар хариу нь сөрөг гарсан.Одоогийн байдлаар батлагдсан тохиолдол 1195 болж, үүнээс эдгэрсэн 824 хүн байна" гэлээ.