Эмийн үнийн өсөлтийн шалтгаан, нөхцөлийг хянан шалгах түр хорооны нотлох баримтыг шинжлэн судлах сонсгол үргэлжилж байна. Өнөөдрийн сонсголоор Эмийн чанарын хяналтын тогтолцоо, цувралын хяналт, эмийн чанарыг шинжлэх лабораторийн хүчин чадал, өнөөгийн нөхцөл байдал, зонхилох тохиолдох өвчинд хэрэглэх зарим эмийн шинжилгээний дүн зэрэг асуудлаар сонсгол үргэлжилнэ. Энэ үеэр УИХ-ын гишүүн Ц.Туваан үг хэлж, асуулт асуулаа.

          Тэрбээр “Бид шинжээчийн дүгнэлтээс ямар эм ууж байгаагаа харлаа. Монгол Улсад лабораторийн нөхцөл ямар байгааг бодит байдлыг л харлаа. УИХ-ын 36 дугаар  тогтоолоор хүнсний хангамжтай холбоотой асуудлыг баталсан. Үүгээр сайн лабораторитой болох асуудлаар ярьсан. Бэлтгэгдэж эхлэхээс хүний аманд орох хүртэл нь шат дараатай шинжлэх хэрэгтэй. Монгол Улс хавдрын олон төрлийн өвчлөлөөр дэлхийд тэргүүлж байгаагийн шалтгаан нь хор идээд байгаатай холбоотой. Одоо яаралтай арга хэмжээ авах хэрэгтэй. Монгол Улсын эмд хяналт тавьж байгаа лабораторийн байгаа байдал нь гайгүй их сургуулийн лабораторийн хэмжээнд ч хүрэхгүй байна. Албаар ийм байлгадаг юм уу, мэдэхгүй байна” гэв.