Улсын Онцгой комиссын нарийн бичгийн дарга Т.Баярхүү тус комиссоос зохион байгуулж буй үйл ажиллагааны талаар мэдээлэл өглөө.

         Тэрбээр “Улсын онцгой комиссоос зудын эрсдлийг бууруулах, хаваржилтын хүндрэлийг бууруулах зорилгоор өнгөрсөн хоёрдугаар сарын 14-ний өдрөөс эхлэн өндөржүүлсэн бэлэн байдлын зэрэгт шилжин холбогдох арга хэмжээг авч ажиллаж байгаа. Цаг уур, орчны шинжилгээний газраас хамгийн сүүлд хийсэн үнэлгээгээр буюу гуравдугаар сарын 31-ний өдөр хийсэн үнэлгээгээр нийт нутгийн 30 орчим хувьд цасан бүрхүүлтэй байсан бол өнөөдрийн байдлаар таван орчим хувьд нь цасан бүрхүүлтэй байна. Увс аймаг хамгийн их цастай. Баянхонгор аймгийн өмнөд хэсгээр бага хэмжээний цастай. Ингээд үндсэндээ нийт нутгийн хэмжээгээр цасан бүрхүүл буурсан байна. Улсын хэмжээнд нийт 6.3 сая мал хорогдсон. Малын хорогдол хамгийн их байгаа нь Сүхбаатар аймаг нэг сая 566 мянга байна. Хэнтий аймаг 842 мянга, Архангай аймаг 658 мянга, Дорноговь аймаг 523 мянга, Төв аймаг 535 мянга, Булган аймагт 317 мянган мал хорогдсон байна. Улсын хэмжээнд малын сэг, зэм устгах ажлыг аймаг, орон нутагт зохион байгуулж байна. Тухайлбал,

Архангай аймагт 56170

Баян-Өлгий аймагт 3700

Баянхонгор аймагт 57000

Булган аймагт 47000

Говь-Алтай аймагт 4700

Говьсүмбэр аймагт 3500

Дархан-Уул аймагт 200

Дорноговь аймагт 82000

Дорнод аймагт 15000

Дундговь аймагт 75000

Завхан аймагт 4000

Орхонд 2600

Өвөрхангай аймагт 700

 Өмнөговь аймагт 2100

Сүхбаатар аймагт 59000

Сэлэнгэ аймагт 9000

Төв аймагт 40000

Увс аймагт 6000

Ховд аймагт 2300

Хөвсгөл аймагт 15000

Хэнтий аймагт 20000 зэрэг нийт улсын хэмжээнд 513948 мал, амьтны сэг, зэмийг устгаж булшлах арга хэмжээг зохион байгуулсан.

     Өчигдрийн байдлаар нийслэлийн Хан-Уул дүүргийн III хороонд их хэмжээний ус тогтсон дуудлагаар нийслэлийн холбогдох байгууллагууд усыг соруулах арга хэмжээг зохион байгуулан ажилласан. Мөн Увс аймгийн Улаангом сумын дөрөв болон наймдугаар хорооны хоёр өрхөд дуудлага ирсний дагуу орон нутгийн Онцгой байдлын байгууллагын албан хаагчид очиж, усыг соруулах, далан, суваг, шудуу татах ажлыг зохион байгуулж, 15 айлын хашаа усанд орох эрсдлээс хамгаалах ажлыг зохион байгуулан ажилласан байна.

          Дотоодын хүмүүнлэгийн тусламжийн хүрээнд Улсын Онцгой комисст 50 иргэн 33 аж ахуй нэгж, 102 төрийн болон төрийн бус байгууллага, 29 төрийн бус байгууллага, гадаадын хоёр байгууллага 3.6 тэрбум төгрөгийн хандив цугласан. Иргэн, аж ахуй нэгж байгууллагаас цугласан бараа материалыг 21 аймаг, орон нутгаар хүргэх ажлыг зохион байгуулсан” гэв.