Зариг.мн сайтын эрхлэгч Н.Өнөрцэцэгийг энэ сарын 4-нд цагдан хорьсон билээ. Тэгвэл өмгөөлөгч П.Эрхэмбаяр өчигдөр түүнтэй уулзсан талаараа мэдээлэл өглөө.

            Тэрбээр “2023 оны арваннэгдүгээр сарын сүүлээр сэтгүүлч Н.Өнөрцэцэг бид хоёр Мөрдөн байцаах албан дээр очиж уулзахад, "Сэжигтнээр мэдүүлэг авна" гэх эрх, үүрэг танилцуулахад нь мэдүүлэг өгсөн. Дараа нь яллагдагчаар татсан тогтоолыг танилцуулах хуулийн зохицуулалттай. Харамсалтай нь, танилцуулж эхлээгүй явуулсан. Мөн прокурорын газраас "Н.Өнөрцэцэг сэтгүүлчид прокурорын мэдэгдэх хуудсыг нийт зургаан удаа өгснөөс хоёр удаад нь ирэхдээ гарын үсэг зураагүй гэж" мэдээлэл өгсөн. Гэсэн ч үлдсэн дөрвөн удаагийнхад Эрүүгийн тухай хуульд хэн гэдэг хүн, хэдэн цагт өгсөн талаар баримтууд авагдсан байх ёстой байсан ч аваагүй байсан. Эрүүгийн хэргийг хянан шийдвэрлэх тухай хуульд хоёр нөхцөл байдал үүссэн тохиолдолд яллагдагч болдог. Нэгдүгээр, яллагдагчаар татсан тохиолдолд тухайн хүн гарын үсэг зурсан байх ёстой. Хэрэв тухайн хүн гарын үсгээ зурахгүй гэвэл мөрдөгч мэдүүлгийг нь уншиж өгч, танилцуулаад тэмдэглэл хийдэг. Гэтэл ямар ч тэмдэглэл хийгээгүй байна. Ингээд өнгөрсөн долоо хоногт Н.Өнөрцэцэгийг цагдан хорих, хилийн хориг тавих, сайтынх нь үйл ажиллагаа эрхлэх эрхийг нь хязгаарлах гээд тодорхой таслан сэргийлэх арга хэмжээнүүдийг авах саналыг Прокурорын байгууллагаас тасралтгүй Шүүх рүү өгсөн. Шүүхийн зүгээс хуулийн хүрээнд процесс явагдах байсан ч ном журмынх нь дагуу процесс явуулаагүй нөхцөл байдал үүссэн байна. Иймээс өмгөөлөгчийн зүгээс холбогдох асуудалд гомдол гаргаад явж байна" гэв.