“Зариг.мн” мэдээллийн сайтын эрхлэгч Н.Өнөрцэцэгийг “Найман ишигний” гэх хэрэгт яллагдагчаар татсан тухай асуудлаар ЦЕГ-аас тайлбар хийлээ.

                         “Цагдаагийн байгууллагад 2023 оны аравдугаар сарын 13-ны өдөр Шүүхийн ерөнхий зөвлөлөөс Н.Өнөрцэцэг нар нь цахим хаягнаасаа олон нийтийн сүлжээнд илтэд худал мэдээлэл тарааж, шүүхийн бие даасан байдал, шүүгчийн хараат бус байдалд нөлөөлсөн байж болзошгүйг шалгуулах гомдол ирүүлснийг Улсын ерөнхий прокурорын газраас мөрдөн байцаах албанд шалгуулахаар тогтсон. Үүний дагуу мөрдөн байцаах албаны мөрдөгчөөс хуульд заасан үндэс, журмын дагуу сэтгүүлч Н.Өнөрцэцэгийг удаа дараа дуудсан боловч “Би ажилтай байна” гэх шалтгааны улмаас ирээгүй. Тухайн үед Н.Өнөрцэцэгийг хүндэтгэн үзэх шалтгааны улмаас ирээгүй гэж үзэж байсан. Гэхдээ мөрдөн байцаах хэрэг хуулийн хугацаа, тодорхой хугацаанд шийдвэр гарах эрх зүйн зохицуулалттай байдаг. Ингээд Шүүхийн ерөнхий зөвлөлөөс ирүүлсэн гомдолтой холбоотойгоор хэрэг бүртгэл нээсэнтэй холбогдуулан 2023 оны арваннэгдүгээр сарын 23-ны өдрийн 15:00 цагт прокурорын дуудах хуудсаар дуудаж, холбогдох ажиллагааг хийсэн. Өнөөдрийн хувьд прокурорын дуудах хуудсаар дахин дуудаж, яллагдагчаар татах тогтоол танилцуулах ажиллагаа хийгдэх байсан. Н.Өнөрцэцэг нь уг асуудлын эхнээс гэрч байгаагүй бөгөөд Шүүхийн ерөнхий зөвлөлөөс ирүүлсэн гомдол, мэдээлэлд гэмт хэрэг үйлдсэн байж болзошгүй гэмт этгээдийг нэр заасан учир гэрч авах зохицуулалт байгаагүй.

Эрүүгийн хэрэг хянан шийдвэрлэх тухай хуульд заасан журмын дагуу явагдаж байгаа гэдгийг үүгээр мэдэгдэж байна. Тухайн иргэний хувьд прокурорын байгууллагаас гаргасан шийдвэрийг эс зөвшөөрвөл дээд шатны прокурорт өөрөө болон өмгөөлөгчөөрөө дамжуулж, гомдол гаргах, хянуулах эрх зүйн зохицуулалттай байдаг. Энэ эрх нь нээлттэй байгаа. Олон дагагчтай, олны танил гээд хуулиар шалгуулахгүй байх эрх зүйн зохицуулалт байхгүй. Тиймээс хүн бүр хуулийн өмнө эрх тэгш эрхтэй байдаг гэдгийг үүгээр мэдэгдье” гэв.