Дэлхийн Хэрэглэгчдийн эрх ашгийг хамгаалах өдрийг 1983 оны гуравдугаар сарын15-нд анх  тэмдэглэж байжээ. Олон улсын хэрэглэгчдийн төлөө байгууллагын үндэс суурь бүр 1960 онд тавигдсан байдаг.  Өдгөө 70 гаруй гишүүн оронтой, дэлхийн эдийн засагт тодорхой байр суурь эзэлсэн хүчирхэг байгууллага болоод байгаа аж.

        Монголын Хэрэглэгчдийн эрх ашгийг хамгаалах нийгэмлэг 1990 оны аравдугаар сарын 20-нд  байгуулагдсан байна. Даян дэлхийн хэрэглэгч бүрийн үндсэн эрх нь мэдээлэл авах, хэрэглээний аюулгүй байдал, сонгох эрх, санал гомдлоо хэлэх эрх гэсэн дөрвөн үндсэн зарчим дээр тогтоно. Түүнчлэн хэрэглэгч бүр эрүүл орчинд үйлчлүүлэх, үндсэн хэрэгцээгээ хангуулах, хэрэглэгчийн боловсрол эзэмших, шаардлагатай тохиолдолд учирсан хохирлоо нөхөн төлүүлэх эрхтэй. Эдгээр зарчмууд нь олон оронд, түүний дотор манай улсад хэрэглэгчийн эрх ашгийг хамгаалах хууль тогтоомжийг батлан гаргах гол үндэслэл болж өгсөн юм. Хэрэглэгчдийн эрх ашгийг хамгаалан дээдлэх, хүмүүст энэ талаар тодорхой ойлголт өгөх зорилгоор энэ өдрийг тэмдэглэн өнгөрөөдөг байна.

Монгол Улсад Хэрэглэгчийн эрхийг хамгаалах хууль 2003 оны арванхоёрдугаар сарын 26-ны өдөр баталж байжээ.

Монголын Хэрэглэгчдийн Эрх Ашгийг Хамгаалах Нийгэмлэгүүдийн Үндэсний Холбоо