Дэлхийн Соёлын сайд нарын бага хуралд оролцож буй Соёлын сайд Ч.Номин “Бүтээлч эдийн засгийн ирээдүй” хуралдаанд илтгэгчээр оролцож, Монгол Улсын Засгийн газрын соёлын бүтээлч үйлдвэрлэлийг хөгжүүлэх бодлого, төлөвлөгөөний талаар танилцууллаа.

      Соёлын сайд Ч.Номин танилцуулгадаа “Монгол Улс нь өнө эртнээс улбаатай, дэлхийд хосгүй гайхамшигт нүүдэлчин соёлдоо тулгуурлан бүтээлч эдийн засгийг хөгжүүлэхээр ажиллаж байгаа бөгөөд НҮБ-ын тогтвортой хөгжил болон бүтээлч эдийн засгийн бодлого, шийдвэрүүдтэй үндэсний хөгжлийн бодлого, тэргүүлэх чиглэлийг уялдуулж соёлыг онцгой чухал бүрэлдэхүүн хэсэг болгон авч үзэж байгаа” хэмээн онцоллоо.

        Мөн тэрбээр дэлхий даяар тархсан цар тахал нь соёлын бүтээлч салбар дахь цахим шилжилтийг улам хурдасгасан нь дэлхийн хэмжээнд соёлын бараа, үйлчилгээний урсгалын тэнцвэргүй байдлыг нэмэгдүүлэхийн сацуу дижитал орчин дахь контент бүтээгч платформуудын тэгш бус төвлөрлийг бэхжүүлж улмаар улс орнуудын хооронд тэгш бус байдлыг гүнзгийрүүлж, хэл болон соёлын олон янз байдалд сөргөөр нөлөөлж буйг анхааруулав.

     Эдгээр саад бэрхшээлүүдийг даван туулахын тулд соёл бол бид бүгдийн өвөрмөц ондоошил ба ижилслийн үндэс суурь гэдгийг хүлээн зөвшөөрч, тогтвортой хөгжилд соёлын оруулах хувь нэмрийг нэмэгдүүэх замаар хэл болон соёлын олон янз байдлыг хамгаалах, дэмжих цоо шинэ, ирээдүйг харсан дэлхийн соёлын бодлого бий болгохын төлөө хамтран ажиллахыг дэлхийн Соёлын сайд нарт уриаллаа.

    Энэхүү дэлхийн соёлын сайд нарын бага хурал 1982 онд Мехико хотод болсноос хойш дөчин жилийн дараа, 1998 онд Шведийн нийслэл Стокгольм хотноо болсноос хойш 24 жилийн дараа зохион байгуулагдаж байна. Хуралд, 160 гаруй орны төлөөлөгчид оролцож байгаагийн 150 орчим нь Соёлын сайд нар оролцжээ.