УИХ-ын гишүүн Т.Доржханд намрын чуулганы нээлтийн үеэр Монгол Улсын 2023 оны төсөвт Монголын эдийн засгийн клуб болон ХҮН намын дэргэдэх бодлого судалгааны хүрээлэнгээс хийсэн эдийн засгийн шинжилгээний талаар мэдээлэл хийлээ.

Тэрбээр “Монгол Улсын эдийн засаг маш хүнд байдалд байна. Цаашдаа ийм байдлаар ажиллах боломж байхгүй. Мөнгөний бодлого хэлэлцэж байх үед бид бизнес эрхэлдэг, эдийн засаг өөд нь татсан улс байх уу, эсвэл төр гэдэг ажил олгогчтой нийгмийн халамжаа өгдөг улс байх уу гэдэг сонголт дээр ирдэг. Долларын ханш цаашаа өсөх шинжтэй байна.Үүнийг шийдэх бодлого байхгүй болсон. Бид төсвөө хэмнэж үүнийг дэмжих ёстой. Өмнөх жилийн төсөв 18 их наяд төгрөг байсан бол энэ жил 20.5 их наядаар орж ирж байна. Мөнгөний бодлогын хүүг нэмээд өөрчлөлт гарахгүй. Үр дүнд нь бид орлого багатай иргэд болон дундаж давхарга санхүүгийн дарамт авч, орлого нь буурна. Эдийн засгийн судлаачид  энэ удаа дуу нэгтэйгээр төсвөө балансжуулахыг зөвлөж байгаа. Тэг хувийн алдагдалтайгаар хийчих. Энэ жилийн алдагдал 1.5 их наяд төгрөгөөр орж ирж байгаа. 2010 оноос хойш олон шилжих барилга барьж байгаа ч ажил нь дуусахгүй байна. Монгол улсын төсөв цемент зуурдаг. Гэтэл өнөөдөр цемент ч байхгүй. Цементээ гадаадаас авна гээд гаалийн татвараа тэглэдэг улс байхгүй. Ирэх жил шинэ хөрөнгө оруулалт байхгүй гэсэн. Угаас дуусаагүй олон барилга байгаа учир энэ боломжгүй. Дуусаагүй барилгуудаа хувийн хэвшилд зарсан. Энэ байдлаар төсвөө тэнцвэржүүлэх шаардлагатай. Ингэж тэнцвэржүүлэхгүй бол дефолт болно. 2023 он бол онцлог жил. Монгол Улс 2023 онд маш их гадаад бондууд төлнө. Хятадын своп зээл ирэх жил төлнө. Ирэх жил 570 сая долларын төлбөр хийгдэнэ. Байхгүй тохиолдолд дампуурал болно. Нэгэнт дефолт болчихвол 10 жил сэргэхгүй. Мөнгөний бодлогыг нэгт тавь. Мөнгөний бодлогоо нэгт  тавиад төсвийн бодлогыг дэмж. Мөн тэтгэврийн зардал 4 их наяд төгрөг болчихлоо. Цагаан сар болохоор ахмадууддаа хайр зарлаж, тэтгэврийн доод хэмжээг 500 мянга болгодог. Тэтгэврийн шинэчлэлийг бүрэн хийх хэрэгтэй" гэв.