Гадаад харилцааны яамнаас Эрээний хил, гаальтай холбоотой асуудлаар мэдээлэл хийлээ. Энэ үеэр Гадаад харилцааны яамны Хилийн хэлтсийн дарга Д.Болд мэдээлэл өгсөн юм.

Тэрбээр “Зургадугаар сарын 4-нд Хятад Улстай хэлэлцсэний үндсэн дээр боомтын үйл ажиллагааг тасралтгүй ажиллахаар зохион байгуулсан. Энэ сарын 4-8-ны хооронд өдөрт дунджаар 30-40 чингэлэг ачаа хилээр орж ирсэн. Өнгөрсөн дөрвөн хоногийн хугацаанд Замын-Үүдийн автозамын боомтоор өдөрт дунджаар 75 чингэлэг ачаа орж ирсэн байна. Хятадын талаас манай улсын хүсэлтийг хүлээн авч жимс, нарийн ногооны ачилтыг хийж эхэлсэн. Эхний 15 нарийн ногоотой чингэлэг энэ сарын 11-нд Монгол Улсад орж ирсэн. Өнөөдөр 9:00 цагийн байдлаар Эрээн хотод коронавирусын 456 тохиолдол бүртгэгдсэн байна. Эрээн хотын шуурхай байдлын албанаас мэдээлснээр сүүлийн гурван хоногт шинэ ковидын голомт үүсээгүй" гэв.