Засгийн газраас гаргасан шийдвэрийг танилцуулж байна. Энэ үеэр Шадар сайд С.Амарсайхан мэдээлэл өглөө. Тэрбээр “Монгол Улсад үйл ажиллагаа явуулж буй мах махан бүтээгдэхүүн боловсруулах, үйлдвэрлэх үйл ажиллагаатай холбоотой асуудлыг судлах, цаашид авч хэрэгжүүлэх арга хэмжээний талаар ярилцлаа. Тавдугаар сарын 31-нд гарсан ажлын хэсэг долоо хоногийн хугацаанд хяналт, шалгалт хийж аж ахуйн нэгжүүдийн удирдлагуудтай уулзаж, иргэдийн саналын сонсож, нөхцөл байдлыг бодитой судлах асуудлыг нягталж, Засгийн газрын хуралдаанд танилцуулсан. Хуралдааны үеэр ямар шийдвэр гарсныг танилцуулъя. 

Мах, махан бүтээгдэхүүн үйлдвэрлэхтэй холбоотой асуудлыг цэгцлэх, хяналтын хатуу тогтолцоонд оруулахаар шийдвэрлэсэн.  Мал төхөөрөхөөс эхлээд ангилж ялгах, савлах, хэрэглэгчийн гарт очих хүртэл нээлттэй, хүнсний аюулгүй байдал, эрүүл ахуйн шаардлагыг хангасан хэмжээнд хяналт тавих горимд шилжихээр болсон. Хоёрдугаарт, дулааны аргаар мах боловсруулах, үйлдвэрлэх зориулалтын үйл ажиллагаа явуулж буй 16 аж ахуйн нэгжийн тусгай зөвшөөрлийг цуцалж, хяналт шалгалтын үйл ажиллагааг үргэлжлүүлэх шийдвэр гарсан. Монгол Улсад мах худалдаалж буй бүх захад үйлдвэрлэлийн аргаар бэлтгэсэн сав баглаа боодолтой нийлүүлнэ. Дулааны аргаар мах боловсруулдаг үйлдвэрүүдийг Улаанбаатар хотоос үе шаттайгаар нүүлгэн шилжүүлж, махны үйлдвэрийн парктай болгож, камержуулна” гэлээ.