Овоог тахиж шүтэх нь зөвхөн шашны утга агуулгатай төдийгүй байгалиа хайрлаж хамгаалах, нутаг орноороо бахархах, үүх түүхээ сэргээн уламжлах, утга санааг өвлүүлэх зэрэг зан үйл, нийгэм ухаарлын томоохон ач холбогдолтой байдаг. Энэ талаар Хамба лам Д.Чойжамц хэлэхдээ “Эрдэнэт Мандал” овоогоо тахих нь Эрдэнэтчүүд, Эрдэнэтэд амьдарч байгаа иргэдэд байгаль дэлхийн ээл өгөөж, тэнгэр бурхны адис жанлав очих юм. Тиймээс зан үйлээ дээдэлж, овоо тахилгаа хийж байх учиртай. Эрдэнэт бол Монгол орноо тэжээж, авч яваа үйлдвэр. Дэлхий нийтийг хамарсан “Ковид-19” цар тахлын үед энэ үйлдвэрийн үр өгөөжийг Монголчууд бүгдээрээ бүрэн ойлгож авлаа. Эдийн засаг, санхүүгийн хүндрэл үүсэж, хорио цээрийн горимд шилжсэн үед айл бүр халуун ус, гэрэл цахилгааны мөнгөө Эрдэнэтээр даалгаж, эрдэнэсийн уурхайн үр шимийг үзсэн. Тиймээс Эрдэнэтчүүддээ ажил хөдөлмөрийн өндөр амжилт, урт настай удаан жаргалтай, өвчин зовлонгүй, барцад мэнд сууж, эд таваар элбэг дэлбэг, үр хүүхэд өнөр өтгөн, байгаль дэлхий нь дэлгэрч байхын өлзийтэй сайхан ерөөлийг дэвшүүлье” гэжээ.