Энэ оны тавдугаар сарын 31-ний шөнө Улаанбаатар хот руу Эмээлтээс нийлүүлэгдэх гэж байсан “Өргөө мийт трэйд” ХХК-ийн найман тонн махнаас чанаж идсэн талаараа  МХЕГ-ын Хүнсний аюулгүй байдлын газрын дарга Т.Балжинням дараах мэдээллийг өглөө. 

Тэрбээр "Надад хувийн ашиг сонирхол байхгүй. Найман тонн махыг өмхийрсөн эсэхийг бодитойгоор үзэгчдэд хүргэе гэх асуудлыг сэтгүүлч надад тавьсан. Миний хувьд шинжилгээний хариу гараагүй байхад болохгүй гэх байр суурийг илэрхийлсэн. Тухайн үед хувь хүнийхээ үүднээс чанаж, амталж үзсэн болохоос төрийн байгууллагын өмнөөс амталж үзээгүй болно. Шинжилгээний хариу гараагүй ч махыг буцалгаж үзэхэд ямар нэгэн эвгүй үнэр байгаагүй зүгээр мах л байсан. Үнэрийг нь дарах ямар нэг боломжгүй. Төрийн ордны гадаа байгаа махыг бол мэдэхгүй байна. Миний амсаж үзсэн мах  лацтай байсан. Агуулахаас дээжийг нь авч амссан. Мах чанаж идсэн бичлэгийг бүрэн эхээр үзэх хэрэгтэй. Шаардлагатай махыг хураан авч, хуулийн дагуу шалгаж байгаа. Зөрчил гарсан аж ахуй нэгж байгууллагыг 3-8 сая төгрөгөөр торгоно" гэлээ