Мөнгө угаах, терроризмыг санхүүжүүлэхтэй тэмцэх олон улсын байгууллагаас Монгол Улсыг өнгөрсөн оны арванхоёрдугаар сард "саарал жагсаалт"-д оруулсан юм. 
“Саарал жагсаалт”-д орсноос хойш холбогдох байгууллагад хэд хэдэн удаагийн тайланг хүргүүлсэн. Монгол Улсын хийж, хэрэгжүүлсэн ажлын үр дүнг энэ оны аравдугаар сарын 21-23-ны өдрүүдэд зохион байгуулагдсан FATF-ын нэгдсэн хуралдаанаар хэлэлцсэн байна. 

Хэвлэлийн хурлын үеэр FATF-ын Ерөнхийлөгч Маркус Плейер Монгол Улс өгсөн даалгаврыг амжилттай биелүүлж, мөнгө угаахтай тэмцэх ажилд ахиц гаргасан болохыг онцолж, “Саарал жагсаалт”-аас гаргасан болохыг зарласнаар манай улс хамгийн хурдан буюу 11 сарын хугацаанд “Саарал жагсаалт”-аас гарсан улс болсон.

Мөрдөн шалгах эрх бүхий байгууллагууд улс дамнасан томоохон мөнгө угаах гэмт хэргүүдийг мөрдөн шалгаж, шийдвэрлэсэн нь "саарал жагсаалт"-аас гарах шалтгаан болсон гэдгийг FATF-аас онцолсон байна. Өөрөөр хэлбэл манай улсын эрх бүхий мөрдөн байгууллагууд гадаад, дотоодын бохир мөнгөний урсгалтай тэмцэх, эдийн засгийн аюулгүй байдлыг хамгаалах чадавхтай, хүчин чармайлт гаргасан гэдгийг баталгаажууллаа.