ТЕГ-аас гүйцэтгэх ажиллагаа явуулж, иргэн Ч.Мөнхбаярыг өчигдөр буюу хоёрдугаар сарын 17-ны өдрийн 15:30 цагийн орчимд баривчилж, түүний гэрт нэгжлэг хийсэн. Тэгвэл өнөөдөр иргэн Ч.Мөнхбаяртай холбоотой асуудлаар ТЕГ-аас мэдээлэл өглөө.

           ТЕГ-ын хэвлэлийн төлөөлөгч П.Өгөөмөр “Иргэн Ч.Мөнхбаяр нь гадаадын тагнуулын байгууллагын санхүүжилтээр үйл ажиллагаа явуулж, хууль бусаар хамтарч ажиллаж байсныг тогтоосон. Иймд ТЕГ-аас хойшлуулашгүй ажиллагаа явуулж, Ч.Мөнхбаярын хууль бус ажиллагааг таслан зогсоож, үйлдэл дээр нь баривчлан мөрдөн шалгах ажиллагааг эхлүүлээд байна. Мөн иргэн Ч.Мөнхбаярын гэрт нэгжлэг хийх үеэр зохих хэмжээний валют илэрснийг эд мөрийн баримтаар хурааж аваад байгаа.

Иргэн Ч.Мөнхбаярын баривчилгаа болон үзлэг, нэгжлэгийн ажиллагааг Эрүүгийн хэрэг хянан шийдвэрлэх тухай хуульд заасан үндэслэл журмын дагуу прокурорын зөвшөөрөлтэйгөөр хуулийн хүрээнд хэрэгжүүлсэн гэдгийг албан ёсоор мэдэгдье. ТЕГ нь прокурорын зөвшөөрсөн хэмжээнд мэдээлэл хийдэг журамтай тул үүнээс илүү мэдээлэл өгөх боломжгүй” гэсэн юм.