Хүндийг өргөлтийн 87 кг-д өрсөлдсөн гавьяат тамирчин М.Анхцэцэг эцсийн мөч хүртэл медалийн төлөө өрсөлдөж, дөрөвдүгээр байр эзэллээ. Манай тамирчин огцом 110 кг-ыг өргөсөн амжилтаар тавд бичигдэж байсан. Улмаар түлхэлттэй өргөлтийн хоёр дахь оролдлогоороо 142 кг-ыг өргөж, дөрөвт орж ирсэн.

       Түүний хувьд хүрэл медаль хүртэхийн тулд 147 кг-ыг өргөх ёстой байв. Ингээд 147 кг-ыг захиалж, медалийн төлөө эцсээ хүртэл тэмцэхээр болсон. Харамсалтай нь захиалгаа өргөж чадалгүй алдаж, дөрөвдүгээр байр эзэллээ. Хэдийгээр медаль хүртэж чадаагүй ч олимпын наадмын дөрөвдүгээр байрт шалгарна гэдэг том амжилт юм. Монголчуудын олимпоос медаль хүртдэг топ дөрвөн төрөл удахгүй тав болж нэмэгдэх боломжтой гэдгийг М.Анхцэцэг харуулж чадлаа. М.Анхцэцэгтээ цаашдын замналд нь амжилт хүсэж, “Парис-2024” олимпод дутуугаа гүйцээхийн ерөөл дэвшүүлье!

Эмэгтэйчүүдийн 87 кг-ын дүн

1.Ван Жоу Юу (БНХАУ) 120 кг+150 кг=270 кг

2.Т.Салазар (Эквадор) 113 кг+150 кг=263 кг

3.С.Фегуэро (Доминикан) 116 кг+140 кг=256 кг

4.М.Анхцэцэг (Монгол) 110 кг+142 кг=252 кг