Хэнтий аймгийн Цэнхэрмандал сумын Нугаар багийн Хэрлэн голын эрэгт амарч байсан иргэн голын усанд сэлэхээр ороод живсэн тухай дуудлагыг тус аймгийн Онцгой байдлын газар долдугаар сарын 16-ны өдрийн 19:05 цагт хүлээн авчээ. Нийслэлийн Багануур дүүргийн Онцгой байдлын хэлтсийн Гал түймэр унтраах, аврах 64 дүгээр ангийн алба хаагчид долдугаар сарын 19-ний өдрийн 06:00 цагаас мөн өдрийн 20:30 цагт хүртэл нийслэлийн Баянзүрх дүүргийн харьяат эрэгтэй, 42 настай иргэн М-ийг эрэн хайх ажиллагааг зохион байгуулжээ. Тухайн иргэн гол руу орох үедээ согтууруулах ундааны зүйл хэрэглэсэн байсан гэнэ. Долдугаар сарын 20-ны өдрийн байдлаар Цэнхэрмандал сумын Нугаар багийн Жаргалантын-Ам гэх газраас Нугаар багийн Шинэ булаг гэдэг газар хүртэл Хэрлэн голын усаар 35 км-т завиар урсаж, эрэн хайх ажиллагааг зохион байгуулсан боловч үр дүнд хүрээгүй тул мөн өдрийн 19:50 цагт түр зогсоожээ. Хэрлэн гол үерлэж, булингар их байгаа нь эрэн хайх ажиллагаа явуулахад хүндрэлтэй байгаа гэнэ. Тэгвэл өнөөдрийн 07:00 цагаас эрэн хайх ажиллагааг дахин эхлүүлжээ.