Монгол Улсын их сургуулийн Сэтгүүл зүйн тэнхимийн профессор Ч.Чойсамба агсны "МУИС-ийн профессорын эрдмийн өв" цуврал номын нээлт өнөөдөр боллоо. Тэрбээр багш, судлаачаар ажиллаж байх хугацаандаа 43 ном бичсэн байдаг.

          Энэ талаар түүний дотны найз, МУИС-ийн Нийгмийн ухааны салбар хариуцсан дэд захирал, доктор /Ph.D/, профессор Б.Болд-Эрдэнэ нь “Хачин их хөдөлмөрч хүн. Ямар сайндаа “Чи жилд хоёр, гурван ном гаргана гээд социалист уралдаанд үүрэг авсан мэт байх юм” гэж хэлж байлаа. 43 насандаа өөд болохдоо 43 ном бичсэн байна лээ. Одоо бодоход богино насандаа амжуулах гэж хичээж, амьдралд их яарч байж дээ гэж боддог юм.  Манай Чой голдуу сэтгүүл зүйн хэл найруулгын талын ном бичсэн. Үг найруулгад онцгой, чин сэтгэлээсээ уусдаг, бачимддаг байсан” гэж дурсжээ.