Монголын и-спортын “IHC” баг “PUBG Mobile”-ын дэлхийн аварга болсон. Түүнчлэн дэлхийн аварга “IHC” багийн тамирчин Zyol буюу Б.Золбоот "PUBG Mobile Global Championship-2023” тэмцээний үнэ цэнтэй тоглогчоор шалгарч, дэлхийн шилдэг тоглогч болсон билээ. Уншигч та бүхэнд Монголын “IHC” багийн тамирчин, “PUBG Mobile”-ын дэлхийн шилдэг Zyol-ыг танилцуулж байна.

Zyol буюу Б.Золбоот 2005 онд төрсөн. Тэрбээр 2018 оноос эхлэн “PUBG Mobile” тоглоомыг тоглож эхэлсэн бөгөөд 2019 оноос цахим сүлжээнд шууд дамжуулалт хийн видео тоглоом сонирхогч хүүхэд, залууст танигдаж эхэлсэн. Харин Zyol мэргэжлийн түвшинд 2020 оноос “Zeus” багийн хамтаар олон улсын тэмцээнд оролцож эхэлсэн бөгөөд тус багийн хамт

• 2020 онд “PUBG Mobile Club Open - Fall Split 2020: Wildcard” тэмцээнд I байр,
• 2021 онд “PUBG Mobile Global Championship 2020” тэмцээнд III байр,
• “PUBG Mobile Pro League - South Asia Season 3” тэмцээнд II байр,
• “Peace Elite Asia Invitational 2021” тэмцээнд III байр,
• “PUBG Mobile Pro League - South Asia Championship Season 1” тэмцээнд II байрт орсон.

Харин “Zeus” баг 2021 оны арванхоёрдугаар сард нэрээ “IHC” болгон өөрчилснөөс хойш “PUBG Mobile”-ын мэргэжлийн лиг, дэлхийн цомын тэмцээнүүдэд оролцож, дөрвөн удаа тусгай байрт шалгарч байв.

Б.Золбоот "PUBG Mobile Global Championship-2023” тэмцээний хүрээнд нийт 37 тоглогч унагаж, 21 ассист өгч, 7616 damage хийснээр хамгийн үнэ цэнтэй тоглогч болсон. Дэлхийн аваргын цом болон шилдэг тоглогчийн шагнал гардаж авах үеэрээ Zyol буюу Б.Золбоот “Байлддаг тоглоомыг байлдаж л тоглолоо” хэмээн сэтгэгдлээ илэрхийлсэн юм.