Монголын рок поп хөгжмийн ахмад хамтлагийн нэг “Харанга” хамтлаг Улаанбаатар концертын их танхимд өнөөдөр, маргааш хоёр өдөр 19:00 цагаас 33 жилийн ойн “Legendary HARANGA: Greatest hits” тоглолтоо хийнэ.

Хүнд рок төрлөөр уран бүтээлээ туурвидаг “Харанга” хамтлагийн хувьд өдгөө анх 1989 онд байгуулагдснаас хойш тасралтгүй уран бүтээлээ туурвиж, олон арван хит дууг үзэгчдэд хүргэсэн билээ. Тус хамтлагийн хувьд энэхүү тоглолтдоо энэ хугацаанд хийсэн уран бүтээлээсээ 25 дууг сонгон дуулах байна.

   Тус хамтлаг нь Үндэсний эрх чөлөө, тусгаар тогтнолоо сэргээн мандуулсны 108 жилийн ойгоор Төрийн соёрхолт шагнал хүртсэн юм. Ингэхдээ тус хамтлагийн “Толин хул”, “Амьдрал”, “Зөвхөн Монголдоо”, “Үгүйлэн санана”, “Энэ бол дурлал биш” зэрэг таван уран бүтээлд нь өгсөн юм.