"Монголын Үнэн" сонины нэрэмжит "Д.Сүхбаатарын мэргэн бууч" 59 дэх удаагийн тэмцээн үргэлжилж байна. Тэмцээний хоёр дахь өдөр 10 м-ийн хийн гар бууны эрэгтэй, эмэгтэй ганцаарчилсан дасгалын медальтнууд тодорлоо. Тэмцээн өнөөдөр цагийн хуваарийн дагуу урт бууны 50 м-ийн дасгалын гурван байрлалын 1-р ээлж Эрэгтэй 09:00 цагт гал нээж эхэлнэ.

    Өчигдөр болсон хийн гар бууны эрэгтэйчүүдийн 10 м-ийн дасгалд “Алдар”-ын Э.Даваахүү алт, “ХУД”-ийн Б.Мөнхбаяр мөнгө, “Хилчин”-ий Э.Бадамгарав хүрэл медаль хүртсэн. Харин эмэгтэйчүүдийн хийн гар бууны 10 м-ийн дасгалд “Алдар”-ын Т.Баярмаа алт, “Снайпер”-ын Т.Гантуул мөнгө, “Хилчин”-ий А.Буяндэлгэр хүрэл медалийг тус тус хүртсэн юм.