Өмнөд Солонгосын Чонжү хотод 2025 оны долдугаар сарын 30-наас наймдугаар сарын 5-ны өдрүүдэд Узбек кураш бөхийн залуучууд, өсвөр үеийн Ази тивийн аврага шалгаруулах тэмцээн зохион байгуулагдсан билээ. Кураш бөхийн Ази тивийн аварга шалгаруулах тэмцээний залуучуудын ангиллын эмэгтэйчүүдийн -70 кг-ын жинд барилдаж мөнгөн медаль хүртсэн “Женко” клубийн тамирчин Ганбатын Маралтай ярилцлаа.

 -Кураш бөхийн Ази тивийн аварга шалгаруулах тэмцээнээс мөнгөн медаль хүртсэнд баяр хүргэе.

       -Баярлалаа.

-Миний дүү өөрийгөө танилцуулахгүй юу?

        -Намайг Ганбатын Марал гэдэг. Би жүдо бөхийн “Женко” клубийн тамирчин.

-Аль аймаг, хотод төрсөн хүүхэд вэ?

      -Би Улаанбаатар хотод төрж, өссөн.

-Одоо хэдэн настай вэ?

      -Яг одоо бол 15 настай. Удахгүй 16 нас хүрнэ.

-Аль сургуулийн хэддүгээр ангид сурдаг вэ?

       -Баянзүрх дүүргийн ерөнхий боловсролын “Амгалан” цогцолбор сургуулийн 11-ийн “Б” ангийн сурагч.

 –Жүдо бөхийн спортоор хэд жилдээ хичээллэж байгаа вэ?

        -Жүдо бөхийн спортыг сонирхон, сонгож хичээллээд таван жил болж байгаа.

 -Спортын ямар зэрэг, цолтой тамирчин бэ?

          –Жүдо бөхийн спортоор хичээллээд удаагүй байгаа өсвөр үеийн тамирчин болохоор одоогоор спортын ямар нэгэн зэрэг, цол аваагүй байгаа.

 -Яагаад жүдо, самбо бөхийн спортыг сонирхож хичээллэх болсон бэ?

      -Жаахан байхаасаа л жүдо бөхийн спортод дуртай байсан. Миний сонирхлыг аав, ээж хоёр маань дэмжсэн учраас би жүдо бөхөөр хичээллэж эхэлсэн юм.

 –Кураш бөхийн Азийн аваргад хэдэн барилдаан хийж мөнгөн медаль хүртэв?

      -Кураш бөхийн Азийн аварга шалгаруулах тэмцээнд гурван тойрог барилдсан. Эхний хоёр тойрогт ялаад финалд шалгарсан. Азийн аваргын алтан медалийг төлөөх барилдаанд хожигдсон.

–Кураш бөхөөр хэзээнээс барилдаж эхэлсэн бэ?

       -Кураш бөхийн төрлөөр анх жилийн өмнө 2024 оноос барилдаж эхэлсэн.

–Гараар  хөл авдаггүй, хэвтээ барилдаангүй, босоо барилдаантай бөхийн төрөл байх аа?

        -Тийм ээ, кураш бөх босоо барилдаантай.

 –Жүдо, самбо, кураш бөхийн тэмцээнүүдэд оролцож, ямар амжилтууд гаргаж байсан бэ?

      -Өсвөр үеийн олон тэмцээнд оролцож нэлээдгүй медаль хүртэж, амжилт гаргаж байсан. Гэхдээ тэр дундаас онцлох юм бол жүдо бөхийн УАШТ-ий хоёр хүрэл медальтай. Кураш бөхийн УАШТ-ээс нэг алтан медальтай. Бүстэй барилдааны УАШТ-ээс хоёр алтан медаль хүртэж байсан.

–Жюү жицүгийн төрлөөр барилддаг уу?

       -Тийм ээ, жүдо бөхийн хэвтээ барилдаанаа сайжруулахын тулд жюү жицүг сонирхон,  барилдаж байгаа.

-Сэтгэлд тань хоногшин үлдсэн хамгийн сайхан дурсамж үлдээсэн нь ямар тэмцээн байсан бэ?

      -Хамгийн анх оролцсон улсын аварга шалгаруулах тэмцээн байсан. Тэр  УАШТ-ээс анхны  хүрэл медалиа хүртэж байсан маань их сайхан дурсамжтай санагддаг.