Япон Улсын Чиба хотноо жюү жицүгийн “IBJJF” холбооны Азийн аварга шалгаруулах тэмцээн болж өндөрлөсөн билээ. Тус Азийн аварга шалгаруулах тэмцээний эмэгтэйчүүдийн 58 кг-ын жинд барилдаж хүрэл медаль хүртсэн “JUMP Mongolia” академийн тамирчин Энхмөнхийн Шүрэнцэцэгтэй ярилцлаа.

-Жюү жицүгийн Ази тивийн аварга шалгаруулах тэмцээний 58 кг-ын жинд барилдаж хүрэл медаль хүртсэнд баяр хүргэе.

     -Танд маш их баярлалаа. Энэ тэмцээнээс хүрэл медаль хүртсэндээ их баяртай байна. Цаашдаа илүү их хичээж, илүү өндөр амжилт үзүүлэхийн төлөө чармайж, бэлтгэлээ базаана.

-Миний дүү өөрийгөө танилцуулахгүй юу?

       -Намайг Энхмөнхийн Шүрэнцэцэг гэдэг. МУБИС-ийн Биеийн тамирын сургуулийн “Жамп” хөтөлбөрийн төгсөгч, жюү жицүгийн тамирчин.

-Одоо хэдэн настай. Аль аймаг, хотод төрсөн хүүхэд вэ?

    -Би одоо 21 настай. Сүхбаатар аймгийн Асгат суманд төрж, өссөн.

-Багадаа спортын ямар төрлөөр хичээллэж байсан бэ?

     -Ерөнхий боловсролын дунд сургуулийн 7-р ангиасаа дугуйн спортоор хичээллэж байсан. Харин оюутан болоод жюү жицүгээр хичээллэж эхэлсэн.

 -Яагаад жюү жицүг сонгож хичээллэх болсон юм бэ?

        -Жюү жицү нь бие бялдар, сэтгэлзүй, оюун ухааныг зэрэг хөгжүүлдэг. Маш сонирхолтой спортын төрөл байгаа юм. Хэзээ ч нэгэн хэвийн байдаггүй тул энэ спортыг сонгосон.

-Жюү жицүгээс өмнө  самбо, жүдо, чөлөөт гээд бөхийн өөр төрлүүдээр хичээллэж байсан уу?

      -Үгүй, Бага байхдаа дугуйн спортоор л хичээллэж байсан. Бөхийн спортын төрлөөр сонирхож, хичээллэж байгаагүй.

-Азийн аварга шалгаруулах тэмцээнд хэдэн барилдаан хийж хүрэл медаль хүртэв?          

         -Энэ удаагийн Азийн аварга шалгаруулах тэмцээнд гурван барилдаан хийж хүрэл медаль хүртсэн.

-Медалийн өнгөө хувиргах боломж байсан уу?

       -Медалийн өнгөө өөрчлөх бүрэн боломж байсан. Барилдааны тактикаа буруу сонгосон гэж бодож байна.

-Жюү жицүгийн спортоор хэд дэх жилдээ хичээллэж байгаа вэ?

      -Би дөрөв дэх жилдээ жюү жицүгээр хичээллэж байна.

-Жюү жицүгийн спортоор хичээллэсэн үеэс хойших томоохон амжилтаасаа сонирхуулахгүй юу?

       -Арабын Нэгдсэн Эмират Улсад зохион байгуулагдсан жюү жицүгийн “Grand Slam” тэмцээнээс алтан медаль хүртсэн. Грек Улсад болсон жюү жицүгийн ДАШТ-ээс хүрэл медаль хүртсэн. Мөн Араб Нэгдсэн Эмират Улсад зохион байгуулагдсан бүсний ангилалтай дэлхийн аварга шалгаруулах тэмцээнээс мөнгөн медаль хүртсэн.

-Хэвтээ барилдаанд гол төлөв ямар мэхийг хамгийн сайн хийж үнэлгээ авдаг вэ?

       -Хэвтээ барилдаанд “Lasso Spider”, “Omoplata”, “Triangle” гэх мэт техникийг илүү сайн хийж, өндөр үнэлгээ авдаг.