“IEM Katowice 2025” тэмцээний хасагдах шатны тэмцээн өчигдөр Польш Улсын "Spodek" аренад боллоо. Монголын "The MongolZ" баг хасагдах шатны эхний тоглолтод Туркийн "Eternal Fire" багийн эсрэг тоглов. Хоёр баг өмнө нь таван удаа учраа таарахад монгол хөвгүүд гуравт нь хожсон гэх давуу үзүүлэлттэй байгаа юм. "Eternal Fire" баг энэ жил бүрэлдэхүүндээ өөрчлөлт оруулж, сүүлийн үед тун сайн тоглож байгааг дурдах хэрэгтэй. Тэдний лидер "XANTARES" 2024 оны дэлхийн шилдэг 20 тоглогчийн нэгээр тодорч байжээ.

     Манай “The MongolZ” баг, Турк Улсын “Eternal Fire” багийг 2:0-ийн харьцаатай буулган авч ялалт байгууллаа. Ингэснээр шөвгийн дөрөвт үлдэж аваргын төлөө өрсөлдөх боломжтой боллоо. Тэдний дараагийн өрсөлдөгч Франц Улсын хүчирхэг баг байх болно.