Хятадын Харбин хотноо зохиогдох Азийн өвлийн IX наадмын нээлтийн ёслолд БНХАУ-ын дарга Ши Жиньпин оролцохоор болжээ. Маргааш буюу 2-р сарын 7-ны баасан гарагт нээгдэх ёслолын арга хэмжээнд Ши Жиньпинээс гадна мөн Киргизийн ерөнхийлөгч Садыр Жапаров, Пакистаны ерөнхийлөгч Асиф Али Зардари, Брунейн султан Хассанал Болкиах, Тайландын Ерөнхий сайд Петхонгтан Чинават, Өмнөд Солонгосын үндэсний ассамблейн дарга Ү Вон Шик нар мөн оролцоно.

      Хятадын удирдагч мөн өдөр Азийн өвлийн IX наадмын нээлтийн ёслолд оролцохоор хүрэлцэн ирсэн гадаадын удирдагчдад хүндэтгэлийн дайллага зохион явуулах юм байна. Орон нутгийн цагаар хоёрдугаар сарын 7-ны орой зохиогдох Азийн өвлийн IX наадмын нээлтийн ёслолыг Хятадын Төв радио, телевиз шууд дамжуулж, “Синьхуа” агентлаг өөрийн веб сайтаараа дамжуулан мэдээлүүдийг зураг, бичвэрээр шуурхай хүргэх ажээ.

      Азийн өвлийн IX наадмын галт бамбарыг дамжуулах арга хэмжээ даваа гарагт Харбин хотноо зохион байгуулагдсан бөгөөд 11 км замыг туулах энэхүү арга хэмжээнд 16-83 насны нийт 120 хүн оролцжээ. Түүнчлэн Харбин 2025 Азийн IX өвлийн наадмын мөсний хоккейн болон керлингийн тэмцээнүүд долоо хоногийн эхээр эхлээд байгаа юм. Хоёрдугаар сарын 7-14-ний хооронд үргэлжлэн явагдах Азийн IX өвлийн наадамд Ази тивийн 34 улс орны 1270 гаруй тамирчид оролцох болно.