Холбоодын Нэгдсэн УАШТ-ий хүрээнд явагдсан буудлагын УАШТ-ий сүүлийн багц медалийн эзэд тодорлоо. Хийн урт бууны холимог багийн тэмцээнд ОУХМ Т.Золжаргал, Б.Эрхэмбаяр нарын бүрэлдэхүүнтэй “Хилчин” спорт хорооны баг ОУХМ Г.Нандинзаяа, Н.Баяраа нарын бүрэлдэхүүнтэй “Снайпер” багийг ширүүн өрсөлдөөний эцэст 17:15-аар буулгаж авав.

      Өнгөрсөн жил энэ хоёр баг финалдахад “Снайпер” ялсан бол “Хилчин”-ийхэн энэ удаа зорьсондоо хүрч чадлаа. Хийн урт бууны ганцаарчилсан төрлийн урьдчилсан шатанд улсын дээд амжилт тогтоосон Б.Эрхэмбаяр тэрхүү дасгалдаа мөнгө авсан бол багийн тэмцээнээс ийн алт зүүв. Түүнчлэн Т.Золжаргал ганцаарчилсан төрөлд медалиас мултран 6-р байр эзэлсэн бол багийн тэмцээнд тун сайн буудаж, багаа аваргалахад чухал үүрэг гүйцэтгэлээ.

      Хүрэл медалийг О.Мөнхзул, Э.Сайнхүү нарын бүрэлдэхүүнтэй “Pinecone” баг хүртсэн. Тэд медалийн төлөөх буудлагад 330-р ангийн багийг 16:12-оор буулгаж авсан юм.

Хийн урт бууны холимог багийн дүн:

1.Хилчин спорт хороо (Т.Золжаргал, Б.Эрхэмбаяр)

2.Снайпер (Г.Нандинзаяа, Н.Баяраа)

3.Pinecone (О.Мөнхзул, Э.Сайнхүү)