Спортын төв ордны “А” зааланд XX зууны манлай дасгалжуулагч, гавьяат дасгалжуулагч В.Батбаярын нэрэмжит боксын насанд хүрэгчдийн улсын аварга шалгаруулах тэмцээн нэгдүгээр сарын 13-17-ны өдрүүдэд болж өндөрлөв. Энэ удаагийн УАШТ-д 37 багийн нийт 173 тамирчин эрэгтэйчүүдийн 10, эмэгтэйчүүдийн долоон жинд тулалдсан юм. Улсын аваргаас Үндэсний шигшээ багийн бүрэлдэхүүнийг шалгаруулах юм байна.

     Боксын ДАШТ-ий мөнгөн медальт ОУХМ Л.Алтанцэцэг  эмэгтэйчүүдийн 48 кг-ын түрүүлж, УАШТ-ий долоо дахь түрээгээ авлаа. Хүнд гэмтэл бэртлээс эргэн ирсэн ОУХМ Б. Мөгөнсаран эмэгтэйчүүдийн 51 кг-ын жинд алтан медаль хүртэж, УАШТ-д дөрөв дэх удаагаа түрүүлж байна. Харин эмэгтэйчүүдийн 54 кг-ын жинд, “Ханжоу-2022” Азийн наадмын хүрэл медальт, ОУХМ О.Есүгэн алтан медаль хүртэж, УАШТ-ий тав дахь түрүүгээ авлаа.

     Эмэгтэйчүүдийн  60 кг-ын жинд хүч үзсэн "Алдар спорт" хорооны боксчин, ДАШТ-ий хүрэл медальт ОУХМ  М.Энхжаргал алтан медаль авав. Тэрбээр гурав дахь удаагаа улсын аваргад түрүүлж байна.  Эмэгтэйчүүдийн 65 кг-ын жинд дэлхийн цомын аварга, “Алдар” спорт хорооны тамирчин, ОУХМ Г.Бадмаараг алтан медаль хүртэж, УАШТ-д хоёр дахь удаагаа түрүүлэв.  Эмэгтэйчүүдийн 70 кг-ын  жинд "Хилчин" спорт хорооны тамирчин ОУХМ Э.Эрдэнэтуяа түрүүлж, ес дэх удаагаа улсын аварга боллоо. Тэрбээр 14 жил боксоор хичээллэж есөн удаа УАШТ-д түрүүлж байгаа юм.

     Харин эрэгтэйчүүдийн 50 кг-ын жинд, дэлхийн цомын аварга, ОУХМ А. Баттулга анх удаагаа улсын аваргад түрүүллээ.  "Хилчин" спорт хорооны тамирчин боксын ОУХМ К.Бекнур 90 кг-ын жинд хүч текникийн илт давуу тоглолт үзүүлэн алтан медаль хүртэж, УАШТ-д гурав дахь удаагаа түрүүлж байна.  "Хүч спорт" хорооны тамирчин ОУХМ О.Энхжин анх удаагаа улсын аварга боллоо. Түүний хувьд улсын аваргын 10 дахь медаль гэнэ. Илт илүүрхэж анхны алтан медалиа хүртлээ. Эрэгтэйчүүдийн 70 кг-ын жинд Баян-Өлгий аймгийн тамирчин А.Жандос алтан медаль авч, УАШТ-ий анх удаа түрүүлж үзлээ.

      Эрэгтэйчүүдийн 80 кг-ын жинд “Ихэр бээлий” клубийн тамирчин, ОУХМ Ө.Төгөлдөр улсын аварга боллоо.  Боксын спортын мастер Д.Бариахаан хоёр дахь удаагаа улсын аваргад түрүүллээ. Орхон-Уул аймагт биеийн тамирын багш хийдэг түүний хувьд бүх ард түмний спартакиадад түрүүлж байжээ.