Шинэ үндсэн хууль батлагдсан өдөрт зориулсан УИХ-ын дарга Г.Занданшатарын нэрэмжит шатар сонирхогчдын улсын аварга шалгаруулах тэмцээн анх удаа цахимаар болж байна. Жил бүр УИХ-ын даргын ивээл дор зохион байгуулдаг уламжлалтай энэ тэмцээн ес дэх удаагаа болж байгаа юм.

Шатар сонирхогчдын энэхүү тэмцээнийг 2021 оны нэгдүгээр сарын 16-26-ны өдрүүдэд www.lichess.org платформ дээр УИХ-ын Тамгын газар, Монголын шатрын холбооноос хамтран зохион байгуулж байна. Монгол Улсын нийслэлийн есөн дүүрэг, 21 аймгийн 330 гаруй сумыг хамруулан бүсчлэн зохион байгуулж буй энэ удаагийн цахим тэмцээнд газар газрын шилдэг шатар сонирхогчид өрсөлдөж байгаа юм.

Уламжлалт тэмцээнийг хорио цээрийн дэглэм тогтоосон энэ хүнд цаг үед өнжилгүй, шатрын спортын онлайнаар тоглодог давуу талыг ашиглан цахимаар зохион байгуулахаар шийдвэрлэсэн байна. Тус тэмцээн эрэгтэйчүүдийн хагас шигшээ, шигшээ гэсэн хоёр үе шаттай болж байгаа бол эмэгтэйчүүдийн тэмцээн нь нээлттэй горимоор болж байна