Боксын “Ихэр бээлий” клубийн өсвөр үеийн тамирчин, Алтангадасын Алтанзултай ярилцлаа. Тэрбээр дунд сургуулийн есдүгээр ангийн сурагч хэдий ч боксын залуучуудын улсын аварга  шалгаруулах тэмцээнд эгч нартайгаа өрсөлдөж мөнгөн медаль хүртэж байсан ирээдүйтэй шилдэг өсвөрийн тамирчин юм.

–Юуны өмнө төрсөн өдрийн баярын мэнд хүргэе.

    - Танд маш их баярлалаа.

 -Төрсөн өдрөө хаана тэмдэглэх вэ. Гэр бүл, найз нөхдийн хүрээнд тэмдэглэдэг үү?

        -Төрсөн өдрөө өмнө нь найз нөхдийнхөө хүрээнд тэмдэглэдэг байсан. Харин энэ жил тэмцээнтэй байж таараад бэлтгэл дээрээ өнгөрөөлөө.

 -Миний дүү өөрийгөө  болон гэр бүлээ танилцуулахгүй юу?

         -Намайг Алтангадасын Алтанзул гэдэг. Манайх ам бүл дөрөв.  

- Хаана, ямар сургуульд сурдаг вэ?

       -Би нийслэлийн “Эрдмийн хөтөч” цогцолбор, 58 дугаар дунд сургуулийн  есдүгээр ангид сурдаг.

-Боксын спортоор хичээллээд удаж байгаа юу?

       -Боксын спортыг сонирхож, сонгон хичээллээд  жил хагас болж байна.

-Охин хүүхэд байж яагаад тулааны эрсдэл ихтэй спортыг сонгох болов?

         -Би зориг, зүрх, хүч сорьсон экстрим спортод дуртай.

-Чиний сонирхлыг  боксын спортын чухам юу нь татав аа?

       - Би өмнө нь олимп, дэлхийн аваргуудыг зурагтаар харж суухдаа, өөрөө бас ингээд зогсох юмсан гэж мөрөөддөг байлаа. Тэгээд л тэр мөрөөдөлдөө хүрэхийн тулд боксын спортод хөл тавьсан.

 -Зодолдож, тулалдах нь сайхан байдаг уу. Биеэ хамгаалж, эрүүл мэндээ бодож боксын спортоор хичээллэж байгаа нь гоё уу?

         -Мэдээж надад аль, аль нь гоё байдаг.

-Бэлтгэл, сургуулилалтаа аль клуб дээр хийдэг вэ?

     -Би боксын “Ихэр бээлий” клуб дээр бэлтгэлээ хийдэг . Ойрын хэдэн сар шигшээ багийн ах, эгч нартайгаа хамт бэлтгэлээ хийж байгаа.

-Хэн багшийн шавь бэ. Өдөрт хэдэн цагийн бэлтгэл хийдэг вэ?

     -Би “Ихэр бээлий” клубийн дасгалжуулагч Т.Ганзориг багшийн шавь.  Өдөрт гурван цагийн бэлтгэл хийдэг. Өглөө нэг цагийн бэлтгэл, үдээс хойш хоёр цагийн бэлтгэл хийж байгаа.  

-Аав, ах нар нь бокс болон тулааны спортоор хичээллэж байсан уу?

     -Аав, ах хоёр боксын спортоор огт хичээллэж байгаагүй. Би анх найзуудыгаа дагаад л боксын клубт очиж байсан.

-Миний дүү өөрийгөө хэр бяр тэнхээтэй гэж боддог вэ?

     -Өөрийн биеэндээ таарсан бяр, тэнхээтэй л гэж боддог. Гоц гойд бяр, тэнхээ бол надад байхгүй ээ.

-Жирийн амьдрал дээр хүч шаардсан ажил гардаг. Тэр бүхэнд түүртээд байхгүй гарын үзүүрээр л хийнэ биз?

         -Өөрийнхөө насны хүүхдийн хийж чадах юмсыг бол гайгүй хийчихдэг дээ.

-Боксын спортод хүч чадал чухал хэдий ч техник, сэтгэл зүй гол тулгуур болдог биз?

       -Тийм шүү, сэтгэл зүй сайтай байж л рингэн дээр өрсөлдөгчөө ялна гэж би боддог.

 -Боксын спортоор хичээллээд гаргасан амжилтуудаасаа сонирхуулахгүй юу?

         - Амжилтуудаас гэвэл бага насны улсын аварга. Олимпын гараа тэмцээний алтан медальтай. Өсвөрийн улсын аварга, хүүхдийн их наадмаас алтан медаль, залуучуудын улсын аварга шалгаруулах тэмцээнээс мөнгөн медаль хүртэж байсан.

-Ирээдүйн хүсэл, мөрөөдөл, зорилго, зорилтоосоо хэлж болох уу?

       -Хэтийн зорилго гэвэл мэдээж олимп дэлхийн аварга болж төрийн дууллаа эгшигшүүлэх. Ойрын зорилго гэвэл энэ жилийн Ази тивийн аварга болон дэлхийн аварга шалгаруулах тэмцээн  гэх мэт томоохон тэмцээнд амжилт гаргах.