Энэ жилийн үндэсний баяр наадамд 1024 бөх зодоглосон билээ. Үүнээс 64 бөхөөс допингийн шинжилгээ авсан бөгөөд зургаагаас долоо нь бүдэрсэн тухай албан бус эх сурвалжууд мэдээлж байгаа юм. Түүнчлэн нэг аваргаас допинг илэрсэн гэх мэдээлэл буй. Энэ жилийн наадмын наймын даваанд С.Мөнхбат аварга, есийн даваанд П.Бүрэнтөгс, Н.Батсуурь аварга нар өвдөг шороодсон. Мөн улсын аварга цолтон шинээр төрсөн наадам болсон билээ. Тиймээс бид бөхчүүдээс допингийн шинжилгээний хариундаа итгэлтэй байгаа талаар тодруулсан юм.

Допингийн шинжилгээний хариу нь хэрхэн гарсан талаар Монгол Улсын аварга Бүрэнтөгсөөс тодрууллаа. Тэрбээр “Одоогоор надад допингийн шинжилгээний хариу ямар гарсан талаар албан мэдээлэл ирээгүй байна. Энэ жил түүхэн ой давхацсан сайхан баяр наадам болж өндөрлөсөн. Би ямар нэг эм, тариа хэрэглээгүй учраас шинжилгээний хариунаас айх юм алга. Хэрвээ допинг хэрэглэсэн бөх байгаа бол харамсалтай. Бид монгол ёс заншлаа дээдэлж жудагтай байх хэрэгтэй” гэв.