Ардын хувьсгалын 100, 101 жилийн түүхт ойн баяр наадамд 1024 барилдсан билээ. Үүнтэй холбоотойгоор жил бүр допингийн асуудалт бөхчүүд нэр холбогдог. Энэ жилийн хувьд 64 бөхийн шинжилгээг Солонгос Улсад явуулснаас 6-7 бөхийн шинжилгээний хариунаас допинг илэрсэн гэх мэдээлэл байгаа юм. Мөн албан бус эх сурвалжийн мэдээлж буйгаар аварга цолтой нэг бөхөөс допинг илэрсэн байна. Удахгүй Монголын Үндэсний Бөхийн Холбоо энэ талаар албан ёсны мэдэгдэл хийх аж.

 Допингийн шинжилгээний хариу нь хэрхэн гарсан талаар тодрууллаа. Энэ жилийн баяр наадамд долоо давж улсын заан цол хүртсэн Лхагвагэрэлийн аав Д.Мөнхтөрөөс хүүгийнхээ допингийн шинжилгээний хариунд итгэлтэй байгаа талаар тодруулсан юм. Тэрбээр  “Энэ жилийн баяр наадамд 1024 бөх барилдаж уран мэх, үнэнхүү хүчийг сорьсон. Миний хүү энэ наадамд барилдаж улсын заан цол хүртсэн баяртай байна. Би хүүдээ итгэж байна. Хүүгээс маань шинжилгээнээс допинг илрэх ямар ч боломжгүй. Бөх сонирхогчид андахгүй биз. Хүү маань байнга шинжилгээ өгч тив, дэлхийд барилдаж явдаг. Тиймээс допинг хэрэглэж бөхийн ёс жудгаа гутаахгүй" гэлээ.