32 дахь удаагийн “Токио-2020” зуны олимпын наадам үргэлжилж байна.

Ээлжит олимпын наадмын байт харвааны тэмцээнийг Э.Саруул шүүн явуулж байгаа юм. Өдгөө 35 настай тэрбээр эрх зүйч, франц хэлний орчуулагч мэргэжилтэй бөгөөд Монгол Улсын түүхэн дэх анхны байт харвааны төрлийн олимпын шүүгч болсон билээ.

Э.Саруул 2007 оноос байт харвааны спортоор хичээллэж, 2009 оноос шүүгчээр ажиллаж эхэлсэн байдаг. Тэрбээр өмнө нь 2013, 2019 оны Ази тивийн аварга шалгаруулах тэмцээн, 2015, 2021 оны залуучуудын Дэлхийн аварга шалгаруулах тэмцээн, 2016 оны Дэлхийн цом, 2016 оны оюутны Дэлхийн аварга шалгаруулах тэмцээн, 2019 оны Универсиад, 2018 оны залуучуудын III олимпын наадамд тус тус шүүгчээр ажиллаж байжээ.