Америкийн Үндэсний сагсан бөмбөгийн холбооны 2020-2021 оны улирлын аварга шалгаруулах цуврал тоглолтууд эхэллээ.

       Аваргын төлөөх өрсөлдөөний эхний тоглолт өрнөд бүсийг тэргүүлсэн “Финикс Санс” багийн талбайд болж, “Финикс Санс” баг 118-105 онооны харьцаатайгаар “Милуоки Бакс” багийг хожиж, аваргын төлөөх цувралыг тэргүүлж эхлэв.

Тоглолтод “Финикс Санс” багийн лидер Крис Пол 37 минут тоглож, 32 оноо авч, есөн оновчтой дамжуулалт өгсөн юм. Харин аваргын төлөөх цувралын эхний тоглолт эхлэхээс өмнө бэртлийн улмаас тоглох эсэх нь эргэлзээтэй байсан “Милуоки Бакс” багийн лидер Яннис Антетокоунмпо тоглолтод оролцож, 20 оноо авч, 17 самбараас бөмбөг авалт үзүүлжээ.

       Америкийн Үндэсний сагсан бөмбөгийн холбооны 2020-2021 оны улирлын аварга шалгаруулах цувралын хоёр дахь тоглолт Монголын цагаар долдугаар сарын 9-ний 09:00 цагт болно.