Японы Осака хотод "КАТАР 2022" хөлбөмбөгийн ДАШТ-ий урьдчилсан шатны Азийн хэсгийн Монгол, Киргизийн багуудын тоглолт өнөөдөр боллоо. Киргизийн багийн хувьд Тажикстантай хэсгээс хоёроор гарах эрхийн төлөө өрсөлдөж байгаа тул ялагдах эрхгүй тоглолт байв. Харин манай багийн хувьд хэсгийн сүүлийн байрнаас салж, дөрөвдүгээр байрт дэвших боломж байлаа. Тоглолтын өмнө Киргизийн багт коронавирусний халдварын сэжиг илэрсэн тул хэд хэдэн тоглогч, дасгалжуулагч нарын хамт тусгаарлагдсан.

Киргизийн баг чансаагаа илүү ч тоглолт тун тэнцүүхэн явагдаж Монголын баг эхний үеийн 34 дэх минутад О.Мижиддорж гоол оруулснаар тоглолтыг тэргүүлж эхэлсэн. Нэг гоолын давамгайллаа сүүлийн мөч хүртэл амжилттай хамгаалж чадсан Монголын шигшээ Киргизийн багийг 1:0 буулган авлаа.