Цэргийн алба хаагчид нэгнээ зодсон асуудлаар ЦЕГ-аас мэдээлэл хийлээ. Энэ үеэр Дотоодын цэргийн 05 дугаар ангийн захирагч, хурандаа Д.Манлайбаатар “Хугацаат цэргийн алба хаагчдын хооронд үүссэн асуудлыг Сонгинохайран дүүргийн цагдаагийн газраас шалгаж байгаа. Шалгалтын явцад олон нийтэд цацагдсан бичлэгт гарснаар нэг алба хаагчийг Шүүх шинжилгээний эмнэлгийн байгууллагад үзүүлсэн. Мөн тухайн үед байсан цэргүүдийг эрүүл мэндийн үзлэгт хамруулж Төрийн тусгай албан хаагчдын нэгдсэн эмнэлэгт шинжилгээ, үзлэгт хамруулж байгаа. Бусад алба хаагчдыг ар гэрийнхэнтэй нь холбогдуулж, гар утсаар яриулах арга хэмжээг авч байгаа. Хугацаат цэргийн алба хаагчдын аюулгүй байдлыг Хүний мэдээллийн тухай хуулийн 27 дугаар зүйлд заасны дагуу хяналт тавих цахим системүүдийг ашигладаг. Манай ангид  68 хяналтын камер ажиллаж байгаа. Үүний 62 камер нь дотогшоо чиглэсэн. Харин ариун цэврийн өрөө, усанд орох өрөө зэрэг хуулиар хязгаарласан бүсэд камер байршуулах боломжгүй. Энэ асуудал нь хугацаат цэргийн албан хаагчдын ахуйн өрөөнд буюу хувцсаа сольдог, угаадаг өрөөнд болсон” гэлээ.