Засгийн газраас Хөрөнгө оруулалтын тухай хуулийг дагалдуулан Газрын тухай хуульд өөрчлөлт оруулах хуулийн төслийг өргөн мэдүүлсэн. Үүнтэй холбоотой гаднын улсын иргэнд 60+40 буюу 100 жилээр газар ашиглуулах зүйл заалт орж байгаатай холбоотой УИХ-ын гишүүн Б.Энхбаяр эсэргүүцлээ илэрхийлж, цахим орчинд мэдэгдэл хийсэн.

Уг асуудлаар УИХ-ын дарга Г.Занданшатар мэдээлэл өглөө “УИХ-ын даргын зөвлөлийн хуралдаанаар долоо хоног болгон чуулганаар хэлэлцэх асуудлын тов дарааллыг батладаг. Олон нийтийн дунд шүүмжлэл дагуулаад байгаа Хөрөнгө оруулалтын тухай хуулийг даргын зөвлөлөөр хэлэлцүүлээгүй. Тэгэхээр энэ  долоо хоногт хэлэлцүүлэхгүй гэсэн үг. Улмаар уг хуулийн төслийг Засгийн газарт буцаана. Холбогдох газруудыг хэлэлцүүлэг, саналыг авах ёстой. Тиймээс энэ хуулийг буцаах саналтай хойшлуулсан. Хөрөнгө оруулалтын хуулийн төслийг дагалдуулан Газрын тухай хуульд өөрчлөлт оруулах төсөлд 60 жилээр газар ашиглуулж, 40 жилээр дахин сунгана гэж орж ирсэн. Энэ заалтыг хэлэлцүүлэхгүй гэж шийдсэн. Гадаад, дотоодын хөрөнгө оруулалт, худалдаа хөрөнгө оруулалтыг дэмжих агуулгаар асуудлыг оруулж ирж болно. Гэхдээ ийм хэлбэрээр оруулж ирж болохгүй. Хууль зүйн байнгын хорооноос Үндсэн хуульд нийцэхгүй гэдэг дүгнэлтээ мөн ирүүлсэн” гэлээ.