Сэлбэ голын далан задарч, БЗД-ийн 27 орон сууц усанд автсантай холбоотой нийслэлийн Засаг дарга бөгөөд Улаанбаатар хотын захирагч Д.Сумъяабазар мэдээлэл хийлээ. Тэрбээр “Сэлбэ голын орчим дээд хэсгээрээ боогдож, стандартын гүүр бариагүйтэй холбоотой хүндрэл үүсэж байна. Борооны улирал долдугаар сарын 12 хүртэл үргэлжлэх төлөвтэй байна. Иймд бид өндөржүүлсэн бэлэн байдлын зэрэгт шилжиж ажиллахаар боллоо.

Засгийн газрын хуралдаанаар УОК-ийн даргатай хамтарч ажиллаж талаар ярилцсан. Тиймээс айж сандрах шаардлагагүй. Бидэнд хангалттай техник, технологи бий. Ажлын багаж зэвсгээ нэмэгдүүлэх үүрэг чиглэл өгсөн. Сонгинохайрхан, Баянзүрх дүүрэгт хүн хүч нэмэгдүүлж, багаж, техник нэмэх чиглэл өгсөн. Шуурхай штабын даргаар нийслэлийн орлогч Ж.Сандагсүрэн ажиллаж байна. Хүн хүчний хувиарлалт тэнд хийж байгаа. Сэлбэ гол орчимд газар дээр нь ажиллаж, дээд болон доод гүүрүүдийг буулгана. Үерийн нөхцөл байдлыг хот төлөвлөлттэй холбоотой гэж та бүхэн үзэж байгаа байх. Үүнийг нууж, хаах зүйлгүй. Тийм зүйл бий. Улаанбаатар хотод өнгөрсөн хугацаанд гарсан алдаа дутагдлыг засаад явж байна. Хоёрдугаарт, газар олголттой холбоотой асуудалтай холбоотой. Хууль зөрчсөн газар олголт түгээмэл байгаа учраас үүний эсрэг бид тэмцэнэ. Би шүүх байгууллагын хүн биш. Тиймээс энэ буруутай, тэр буруутай гэж хэлэхгүй. Хотын зүгээс зөвшөөрөлгүй барьсан барилга байгууламжийг нураах арга хэмэжээ авна. Эхний ээлжид таван барилгыг нураах жагсаалт гаргасан. Улаанбаатар хотод зөвшөөрлөгүй барилга барихыг бид хориглоно” гэлээ.