Засгийн газар Оюутолгой төслийн гүний уурхайн бүтээн байгуулалтын зардал нэмэгдсэн, хугацаа хойшилсон шалтгааныг судлан дүгнэлт гаргах зорилгоор хөндлөнгийн хяналт хийлгэхээр болсон юм. Энэ дүгнэлтийн талаар Засгийн газрын гишүүд мэдээлэл хийлээ. Хөндлөнгийн шинжээчдийн дүгнэлтээр Оюутолгойн гүний уурхайн бүтээн байгуулалтын зардал өсөж, ашиглалтад оруулах хугацаа хойшилсон нь геотехникийн асуудалтай холбоогүй гэж үзсэн байна.

УУХҮ-ийн сайд Г.Ёндон "Оюутолгой төслийн хувьцаа эзэмшигчээр компанийн далд уурхайн ажил удааширсан гэдгийг бид мэднэ. Хөндлөнгийн шинжээчийн дүгнэлтээр геотехникийн асуудалтай холбоогүй гэж дүгнэлээ. 20-40 жил ажилласан туршлагатай шинжээчийг гуравдугаар сараас ажиллуулсан.  Харин Рио Тинто групп биднээс хамааралгүйгээр ажил хойшилсон гэж үздэг. Рио Тинто группээс хамааралгүй, бие даасан шинжээчдийг бүрдүүлэх нь амар байсангүй. Нийт найман гишүүн шинжээчдийн багт ажилласан. "Оюутолгой" ХХК-ийн ТУЗ энэ дүгнэлтийг удахгүй хэлэлцэнэ" гэв.