“Эрдэнэт үйлдвэр” ТӨҮГ-ын Ус хангамжийн цех, цэвэрлэх байгууламжийн хэсгийн хлораторын станцад  дэлбэрэлт болж  37 настай эмэгтэй Г хүнд бэртэж эмнэлэгт хүргэгдсэн талаарх мэдээлэл цацагдаад байна. Бэртсэн иргэний биеийн байдал хүнд, баруун талын гар, хөл, нүүр хэсэг химийн бодист түлэгдэж гүнзгий шарх үүсчээ. Иргэн Г-г яаралтайгаар ГССҮТ шилжүүлж байгаа аж. Урьдчилсан байдлаар химийн бодис хадгалалтад технологийн алдаа гарсан байж болзошгүй гэнэ.

Энэ талаар “Эрдэнэт үйлдвэр”-ийн ерөнхий менежер Т.Батмөнхөөс тодруулахад “Савтай хлор задарсан. Хажууд нь байсан эмэгтэй хөл хугарч, бэртсэн. Яг одоо онгоцны дуудлага аваад явж байна. Бэртсэн хүнээ тээвэрлэх гэж байгаа. Одоогийн байдлаар манай ажилтны хөл хугарч, бэртсэн байна. Эмнэлгийн яаралтай тусламж үзүүлсэн. Амь нас нь аюулгүй” гэв.