Сангийн сайд Б.Жавхлан “Хүний нөөцийг хөгжүүлэх тэтгэлэгт хөтөлбөр”-ийн солилцох ноот бичиг болон буцалтгүй тусламжийн хэлэлцээрт гарын үсэг зурав.

Япон Улсын Засгийн газрын буцалтгүй тусламжаар хэрэгжих 290 сая иений санхүүжилт бүхий “Хүний нөөцийг хөгжүүлэх тэтгэлэгт хөтөлбөр”-ийн солилцох ноот бичиг болон буцалтгүй тусламжийн хэлэлцээрт Монгол Улсын Засгийн газрыг төлөөлж Сангийн сайд Б.Жавхлан, Япон Улсын Засгийн газрыг төлөөлж Япон Улсаас Монгол Улсад суугаа Онц бөгөөд бүрэн Эрхт Элчин сайд М.Игавахара болон ЖАЙКА-ын Монгол дахь Төлөөлөгчийн газрын дарга Танака Шиничи нар 2024 оны 06 дугаар сарын 05-ны өдөр гарын үсэг зурлаа.

                          “Хүний нөөцийг хөгжүүлэх тэтгэлэгт хөтөлбөр” нь зах зээлийн эдийн засагт шилжсэн улс орнуудын хүний нөөцийн хөгжлийг дэмжих зорилготой бөгөөд тухайн орны хөгжилд хувь нэмэр оруулах залуу төрийн албан хаагчдыг Япон Улсын их дээд сургуулиудад суралцуулж, мэдлэг олгодог хөтөлбөр билээ. 

Монгол Улс уг хөтөлбөрт 2001 оноос хамрагдаж өнөөгийн  байдлаар нийт 416 албан хаагчид Япон Улсын их дээд сургуулиудад суралцан, санхүү, эдийн засаг, хууль, эрх зүй, уур уурхай, боловсрол, эрүүл мэндийн чиглэлээр мэргэжил, боловсрол, ур чадвараа дээшлүүлэн, эх орондоо буцан ирж үр бүтээлтэй ажиллаж байна. 

Япон Улс нь Монгол Улсын хүний нөөцийг хөгжүүлэх, чадварлаг боловсон хүчин бэлтгэхэд дэмжлэг үзүүлэн хоёр орны найрамдалт харилцаа, хамтын ажиллагаанд үнэтэй хувь нэмэр оруулж байна.