Хэл бичгийн ухааны доктор, зохиолч, утга зохиол судлаач, шүүмжлэгч "Алтан-өд" наадмын зургаа дахь удаагийн шагналт, Монголын Зохиолчдын  Эвлэлийн шагналт, "Гэгээн муза"шагналын эзэн, зохиолч  П.Батхуяг тэнгэрт дэвшиж, Монголын утга зохиолын салбарт хүнд гарз тохиолоо.

Тэрээр 1975 онд Улаанбаатар хотод төрсөн бөгөөд 1997 онд "Дорно дахины утга зохиол"-ын дээд сургуулийг төгссөн байна. Мөн 2001 онд Монгол Улсын Их сургуулийн магистрантур, 2004 онд Монгол Улсын Боловсролын их сургуулийг аспирантураар төгссөн яруу найрагч, үргэлжилсэн үгийн зохиолч, утга зохиол судлаач юм. Тэрээр эсээ, богино өгүүллэг, тууж, жүжгийн зохиол, шүлэг зэрэг олон төрлөөр туурвисан олон ном бүтээлийг бидэнд үлдээсэн билээ. Хамгийн сүүлд гэхэд "Нохой далайн зомгол" тууж, өгүүллэгийн түүвэр, "Эсээ оршил буюу элдэв эсээс", "Намар гэрэлтэгч үгс" яруу найргийн түүвэр, "Чулуун бөмбөрийн нүргээн" зэрэг жүжгийн түүвэр хэвлүүлсэн юм. Мөн тэрээр  "Утгын чимэг-2021" наадамд "Агь нүдэлж байлаа" өгүүллэгээрээ тэргүүн байр эзэлсэн билээ.

 Талийгаачийн ар гэр, түүний уран бүтээлийг уншиж, номын дууг сонссон шавь нарр болон Монголын уран зохиолын салбарынханд гүнд эмгэнэл илэрхийлье.